گازا سەكتورىندا فەلدشەرلەر قالاي جۇمىس ىستەپ جاتىر
گازا. KAZINFORM - اراب قىزمەتى گازا تۇرعىندارىنىڭ شۇعىل كومەككە مۇقتاج قوڭىراۋىنا ءبىرىنشى بولىپ جاۋاپ بەرەتىن پالەستينانىڭ قىزىل جارتى اي قوعامى (PRCS) فەلدشەرلەرىنىڭ جۇمىسىنا كۋا بولدى.
يزرايل مەن حاماس اراسىنداعى سوعىس باستالعاننان كەيىن جەرگىلىكتى جۋرناليست فەراس ءال-اجرامي جەدەل جاردەم بريگاداسىمەن ءبىر اي بويى بىرگە بولدى.
فەلدشەر ماحمۋد ءال-ماسري مەن ونىڭ كومانداسىنىڭ مۇشەلەرى گازانىڭ سولتۇستىگىندەگى ءال-اۋدا اۋرۋحاناسىندا كەزەكتى قوڭىراۋدى كۇتتى.
قوڭىراۋ جەرگىلىكتى ۋاقىت بويىنشا ساعات 14:00 شاماسىندا تۇسكەن.
ديسپەتچەر 5-15 جەدەل جاردەم كولىگى سوققىعا ۇشىراعانىن حابارلادى. ونىڭ ىشىندە ماحمۋدتىڭ اكەسى فەلدشەر يوسري ءال-ماسري جۇمىس ىستەگەن بريگادا بولدى.
ماحمۋد جانە ونىڭ ارىپتەستەرى نە بولعانىن ءبىلۋ ءۇشىن وقيعا ورنىنا باردى.
فەلدشەرلەر وقيعا ورنىنا جەتكەندە، جەدەل جاردەم كولىگىنىڭ جولدىڭ جيەگىندە جاتقانىن كوردى. ول ابدەن مايىسقان مەتال بولشەگىنە اينالعان.
ماحمۋد بولشەكتەرگە قاراي جۇگىردى. ونىڭ ايتۋىنشا، ىشىندەگى بارلىق نارسە كەسەكتەرگە ءبولىنىپ، تولىعىمەن ورتەنىپ كەتكەن.
ونىڭ اكەسى جانە پالەستينانىڭ قىزىل كرەست قوعامىنىڭ تاعى ەكى قىزمەتكەرى قايتىس بولدى.
«ونىڭ بەتىنەن تۇك قالماعان»، - دەپ ەسكە الادى ماحمۋد.
بۇل جاعداي 11- قازاندا، يزرايل مەن حاماس اراسىنداعى سوعىس باستالعاننان بەس كۇن وتكەندە بولدى.
اكەسى قايتىس بولعاننان كەيىن ءۇش بالاسى بار 29 جاستاعى ماحمۋد ەكى اپتا دەمالىس الدى.
ءبىراق، ءوزىنىڭ ايتۋىنشا، قايعىسىنا قاراماستان ول جۇمىسىنا قايتا ورالعان.
«پالەستينا حالقىنا قىزمەت ەتۋ - مەنىڭ مىندەتىم»، - دەيدى ول.
ماحمۋد جەتى جىلدان بەرى فەلدشەر بولىپ جۇمىس ىستەيدى. ول گازا سەكتورىنىڭ سولتۇستىگىندەگى دجاباليا قالاسىنداعى پالەستينا قىزىل جارتى اي قوعامى كومانداسىنىڭ مۇشەسى.
BBC- دىڭ اراب قىزمەتى تۇسىرگەن فيلمدە اسىرەسە وققا ۇشقان سابيلەردىڭ دەنەسىن كوتەرىپ كەلە جاتقان فەلدشەرلەردىڭ ەموتسيونالدى كۇيى انىق كورسەتىلگەن.
سوعىستىڭ العاشقى كۇندەرىندە فەلدشەر رامي حاميس جەدەل جاردەم كولىگىن ايداپ كەلە جاتىپ، كوزىنە جاس الدى.
ول قۇلاعان ءۇيدىڭ استىندا قالىپ قويعان ادامدارعا شاقىرىلعانىن ايتتى. ونداعى زارداپ شەككەندەردىڭ كوبى ايەلدەر مەن بالالار.
ول ءۇيدىڭ ءبىر بولمەسىنەن ءۇش قىزدىڭ دەنەسىن تاۋىپ الدى، كوز الدىنا ءوزىنىڭ ءۇش قىزى كەلدى.
«مەن سول جەردە وزىمە يە بولا المادىم. مۇنداي كورىنىستى كورگەندە كوزىڭە ەرىكسىز جاس كەلەدى»، - دەدى رامي.
ونىڭ جىلاپ تۇرعان ۆيدەوسى ينتەرنەت جەلىسىندە كەڭ تاراپ كەتتى.
قازان ايىنىڭ سوڭىندا فەلدشەرلەر توبىنىڭ باسقا مۇشەسى الاا ءال-حالابيگە تۋىسى قوڭىراۋ شالدى.
الاانىڭ ايتۋىنشا، اعاسىنىڭ ءۇيى ەكى كۇن بۇرىن يزرايل اۋە شابۋىلىنان قيراعان، ءبىراق قازا تاپقانداردىڭ كوبى ءالى ءۇيىندى استىندا.
تۋىسقان اعاسىنىڭ دەنەسى الدەقاشان شىعارىلعان، ول ونى اۋرۋحاناعا جەتكىزەمىن دەپ ۇمىتتەندى.
الاا ءبىر توپ ادام وپىرىلىپ قۇلاعان بەتون ءۇيىندىسىن جىلجىتپاق بولعان تار قۋىسقا كىرگەندە، تۋىستارىنىڭ ءبىرى ول جەردە كىشكەنتاي قىزدىڭ دەنەسى جاتقانىن ايتتى.
الاا كىدىرىپ، تەرەڭ تىنىس العان سوڭ (بەت-الپەتىن مەديتسينالىق ماسكانىڭ ارتىنا جارتىلاي جاسىرىپ قويعان) ءسوزىن جالعاستىردى:
«مۇندا قىزدىڭ دەنەسىنىڭ بولشەكتەرى بار».
سول كۇنى الاا جانىپ كەتكەن بەس بالانىڭ دەنەسىن تاپتى. پوليەتيلەن پاكەتكە سالىنعان ءۇش ءمايىت اۋرۋحاناعا جەتكىزىلدى، الاا پروتسەستى ءجىتى قاداعالادى.
«ءولى بالالاردىڭ دەنەسىن كوتەرىپ تۇرعاندا ءوز بالاڭدى كوتەرىپ تۇرعانداي سەزىمدە بولاسىڭ» دەيدى ول.
سوعىس باستالعاننان كەيىن ءبىر اپتا بۇرىن يزرايل گازا سەكتورىنىڭ سولتۇستىگىندەگى بەيبىت تۇرعىندارعا وزدەرىنىڭ قاۋىپسىزدىگى ءۇشىن انكلاۆتىڭ وڭتۇستىگىنە كوشۋگە بۇيرىق بەردى، سوندىقتان فەلدشەرلەردىڭ وتباسىلارىنىڭ كوپشىلىگى ەۆاكۋاتسيالاندى.
جەدەل جاردەم قىزمەتكەرلەرى گازانىڭ سولتۇستىگىندە قالدى. ولار تەلەفون نەمەسە PRCS راديو جەلىسى ارقىلى ايەلدەرىمەن جانە بالالارىمەن ءۇزىلىسسىز بايلانىستا بولدى.
سونداي-اق، الاا كەتكەندە بالالارىنىڭ جىلاعانىن، جول بويىندا اللادان امان-ساۋ قايتىپ ورالۋىن سۇراپ، ۇنەمى دۇعا ەتكەنىن ايتتى.
PRCS قىزمەتكەرلەرى مەن ۆولونتەرلەرى قاۋىپ پەن قاتەردىڭ بەل ورتاسىندا ءجۇردى.
بىرنەشە فەلدشەر ال-اۋدا اۋرۋحاناسىنىڭ سىرتىندا كولىكتە بولعان كەزدە، جاقىن جەردە جارىلىس بولىپ، ولار جاسىرىنۋعا ءماجبۇر بولدى.
كەم دەگەندە ەكى جەدەل جاردەم كولىگى زاقىمداندى.
پالەستينا قىزىل جارتى اي قوعامىنىڭ مالىمەتىنشە، 7- قازاننان بەرى گازادا ۇيىمدا جۇمىس ىستەيتىن 14 فەلدشەر قازا تاپقان.
«ءاربىر شاقىرتۋ ءبىزدىڭ كوماندا مۇشەلەرىنىڭ ومىرىنە قاۋىپ توندىرەدى»، - دەدى قىزىل جارتى اي وكىلى نەبال فارساح BBC گە بەرگەن سۇحباتىندا قازا بولعان قىزمەتكەرلەرىنىڭ ءتىزىمىن كورسەتىپ.
