گازا سەكتورىنان قازاقستاننىڭ بارلىق ازاماتى ەۆاكۋاتسيالاندى
Kazinform تىلشىسىنە ەكسكليۋزيۆ سۇحبات بەرگەن ق ر سىرتقى ىستەر ءمينيسترى مۇرات نۇرتىلەۋ قازاقستان ازاماتتارىن گازا سەكتورىنان ەۆاكۋاتسيالاۋ قالاي جۇرگىزىلگەنىن ايتىپ بەردى.
«گازا سەكتورى اۋماعىندا كوپتەگەن قازاقستاندىق بولعانىن ەسكەرە وتىرىپ، س ءى م قازاقستاننىڭ مەملەكەتتىك ورگاندارىمەن بىرلەسىپ ازاماتتاردىڭ ەركىندىگى مەن قۇقىعىن قورعاۋ ءۇشىن سوعىس ءجۇرىپ جاتقان ايماقتان ەۆاكۋاتسيالىق رەيستەر ۇيىمداستىرىپ، 127 ادامدى، ونىڭ ىشىندە وتباسى مۇشەلەرىن وتانىنا قايتاردى»، - دەدى مۇرات نۇرتىلەۋ.
ايتۋىنشا، قازىر گازا اۋماعىندا ءبىر قازاقستاندىق پەن ونىڭ 10 وتباسى مۇشەسى - پالەستينا ازاماتتارى بار. ولار ەۆاكۋاتسيالاۋدان باس تارتتى.
«مينيسترلىك پەن قازاقستاننىڭ شەتەلدەگى مەكەمەلەرى جاعدايدى باقىلاپ وتىر، ەگەر قازاقستاندىقتاردى شىعارۋ تۋرالى ءوتىنىش تۇسسە، ەۆاكۋاتسيا ۇيىمداستىرۋعا دايىن. سونداي-اق گازا سەكتورىندا گۋمانيتارلىق جاعداي ناشارلاپ كەتكەنىنە بايلانىستى پرەزيدەنت قاسىم-جومارت توقايەۆتىڭ تاپسىرماسىمەن قازاقستاننان گازا تۇرعىندارىنا 1 ميلليون ا ق ش دوللارى مەن 38 توننا گۋمانيتارلىق كومەك جىبەرىلگەنىن ەسكە سالا كەتەيىن. ونىڭ ىشىندە ازىق-تۇلىك، توسەك-ورىن جابدىعى، ءدارى-دارمەك پەن مەديتسينالىق بۇيىمدار جانە ت. ب. زاتتار بار»، - دەپ اتاپ ءوتتى س ءى م باسشىسى.
م. نۇرتىلەۋ ازاماتتاردى وتانىنا ەۆاكۋاتسيالاۋ جۇمىسىنىڭ ءساتتى جۇرگىزىلۋى مەن گۋمانيتارلىق جۇكتى جەتكىزۋ ق ر مەملەكەتتىك ورگاندارى مەن شەتەلدەگى وكىلدىكتەرىنىڭ ورتاق جۇمىسىنىڭ ناتيجەسى ەكەنىن ايتتى.
17- قاراشادا قازاقستان بيلىگىنىڭ ءبىرىنشى ەۆاكۋاتسيالىق بورتى 99 ادامدى - 59 قازاقستان ازاماتى مەن 40 شەتەلدىكتى وتباسى مۇشەلەرىمەن بىرگە وتانىنا جەتكىزگەنىن ەسكە سالا كەتەيىك. ەكىنشى رەيس ەگيپەتتەن 11- جەلتوقساندا كەلىپ، استاناعا 28 ادامدى - 8 قازاقستان ازاماتى مەن پالەستينالىق 20 ادامدى جەتكىزدى.
