از سومادا موبيلدى اۋدارىم العاندارعا سالىق سالماۋ ۇسىنىلدى
استانا. KAZINFORM - قازاقستاندا وتە تومەن سومادا موبيلدى اۋدارىم الاتىن ادامدارعا سالىق سالماۋ ۇسىنىلىپ وتىر. بۇل تۋرالى مەملەكەتتىك كىرىستەر كوميتەتى جەكە تۇلعالاردىڭ كىرىستەرىن اكىمشىلەندىرۋ باسقارماسىنىڭ باس ساراپشىسى ەرسايىن كوپتىلەۋ ۇلى ايتىپ بەردى.

ماماننىڭ ايتۋىنشا، قازىرگى ولشەمشارتتا اۋدارىم سوماسىنا ەش مەجە قويىلماعان. اي سايىن 100 ادام 100 تەڭگەدەن اۋدارسا دا، كىرىستەر ورگاندارىنىڭ نازارىنا ىلىنەدى.
− وسىعان بايلانىستى، قارجى مينيسترلىگى تاراپىنان ۇسىنىس بەرىلگەن بولاتىن. كاسىپكەرلىك كودەكسىندە 12 ەسەلەنگەن ەڭ تومەنگە جالاقىعا دەيىن (1020000 تەڭگە) ءاربىر ادام جەكە كاسىپكەر رەتىندە تىركەلمەي ءوز قىزمەتىن جۇرگىزۋگە، تابىس تابۋعا مۇمكىندىگى بار. وسى نورمادان اتتاپ كەتپەۋ ماقساتىندا، وتە تومەن سومادا ءموبيلدى اۋدارىم الاتىن ادامداردى اكىمشىلەندىرمەۋ ماقساتىندا اي سايىن 100 نەمەسە ودان دا كوپ تۇلعالاردان ءۇش اي قاتارىنان، جالپى سوماسى 255 مىڭنان اساتىن اۋدارىم قابىلدانسا، سوندا عانا نازارعا الىنسىن دەگەن ۇسىنىس بەرىلدى. بۇل ءقازىر ۇلتتىق بانكپەن كەلىسۋ ساتىسىندا، ءالى قولدانىستا ەمەس، − دەدى ەرسايىن كوپتىلەۋ ۇلى اگەنتتىكتىڭ «Bizdin orta» پودكاستىندا.
بۇل رەتتە 255 مىڭ تەڭگە - ەڭ تومەنگى جالاقىنىڭ (85 مىڭ تەڭگە) ءۇش ەسەلەنگەن مولشەرى.
− قازىر ءبىر اۋدارىمنىڭ ءوزى 255 مىڭدى قۇراۋى مۇمكىن، ولار نازارعا الىنبايدى. سوندىقتان، ءۇش اي قاتارىنان ءۇش تومەنگى جالاقى مولشەرىنەن اساتىن اۋدارىمداردى عانا نازارعا الۋ ۇسىنىسىن ەنگىزدىك. الداعى ۋاقىتتا بۇل قولدانىستا بولۋى مۇمكىن، - دەيدى كوميتەت وكىلى.
موبيلدى اۋدارىمدار تەك Kaspi ەمەس، بارلىق بانكتە باقىلاناتىنىن جازعان بولاتىنبىز.