ايگىلى وكسفورد ۋنيۆەرسيتەتىنىڭ ستۋدەنتتەرى مەن وقىتۋشىلارى قازاق ءتىلىن ۇيرەنبەك
بۇل - ءبىزدىڭ انا تىلىمىزگە قىزىعۋشىلىق تانىتىپ وتىرعان ۇلىبريتانياداعى العاشقى جوعارعى وقۋ ورنى.
وكسفورد ۋنيۆەرسيتەتى ءوز ستۋدەنتتەرى مەن وقىتۋشىلارىنا قازاق ءتىلىن ۇيرەتپەك، دەپ حابارلادى 24.kz.
شەتەلدىكتەر تىلىمىزدەن بولەك قازاقستاننىڭ باي تاريحى مەن مادەنيەتىن دە تەرەڭىنەن زەرتتەگىسى كەلەدى.
لەيلا نادجافزادا - وكسفورد ۋنيۆەرسيتەتى جانىنداعى «ءبىر ءسوز» باستاماسىنىڭ ديرەكتورى. باستاما دەگەنىمىز ۋنيۆەرسيتەت قارجىلاندىراتىن، ءبىراق اكادەميالىق بىلىمگە جاتپايتىن جوبا. لەيلانىڭ ايتۋىنشا، اتاقتى وقۋ ورنىندا تۇرىك تىلىنە دەگەن قىزىعۋشىلىعى جوعارى ستۋدەنتتەر مەن وقىتۋشىلار وتە كوپ. ولار تۇركىتىلدەس تىلگە جاتاتىن قازاق ءتىلىن دە مەڭگەرگىسى كەلەدى. ءتىل ارقىلى مادەنيەتى باي، تاريحى تەرەڭ ەلىمىزدى تانۋدى قالايدى.
«قازاقستانعا جانە قازاق تىلىنە دەگەن قىزىعۋشىلىعىم وراسان بولدى. وتكەن جىلدىڭ ساۋىرىندە الماتىعا بارىپ، احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورىمەن كەزدەستىم. ءقازىر ءبىز وسى عىلىمي زەرتتەۋ ورتالىعىمەن تىعىز بايلانىس ورناتىپ، قازاق ءتىلىن وقىتۋ ادىستەرىن مەڭگەرىپ جاتىرمىز. وسىلايشا وكسفورد ۋنيۆەرسيتەتى قازاقشا ۇيرەتەتىن ۇلىبريتانياداعى العاشقى وقۋ ورنى بولعالى تۇر»، - دەيدى وكسفورد ۋنيۆەرسيتەتى جانىنداعى «ءبىر ءسوز» باستاماسىنىڭ ديرەكتورى لەيلا نادجافزادا.
ۇلى دالا ەلىنىڭ تىلىمەن قاتار تاريحى، بۇگىنى جانە بولاشاعى تۋرالى بىلگىسى كەلەتىن وكسفوردتىقتار كوپ. ولارعا قازاقستاننىڭ ۇلى بريتانياداعى ەلشىسى ارنايى ءدارىس وقىدى. ماعجان ءىلياسوۆ وكسفورد يسلام تانۋ ورتالىعىندا ەلىمىزدىڭ ماڭىزدى تاريحي كەزەڭدەرىنە توقتالىپ، جەتكەن جەتىستىكتەرى تۋرالى باياندادى. تولەرانتتىلىق ۇلگىسىن تانىتقان كوپ ەتنوستى جانە كوپ كونفەسسيالى قازاقستان تۋرالى ايتىپ بەردى.
«ءبىزدىڭ ورتالىق قازاقستانمەن بايلانىس ورناتۋعا مۇددەلى. وكسفورد جۇرتشىلىعى ەلدەرىڭىزدىڭ تاريحىنان باسقا تىڭ اقپاراتتارمەن دە تانىسقىسى كەلەدى. ەلشى بىزگە وركەنيەتتىڭ دامۋىنا قازاقستاننىڭ قوسقان ولشەۋسىز ۇلەسىن جىلىكتەپ، جەتكىزدى. وتكەنىنەن بولەك، بۇگىنگى تىنىس- تىرشىلىگى تۋرالى دا اڭگىمەلەدى. سىزدەرمەن ەكونوميكا، ءبىلىم سالالارىنداعى بايلانىستاردى نىعايتىپ، بولاشاققا بىرگە جوسپارلار قۇرۋ وتە ماڭىزدى دەپ ويلايمىن»، - دەيدى وكسفورد يسلامتانۋ ورتالىعىنىڭ ديرەكتورى فارحاد احماد نيزامي.
كەزدەسۋ XVI- XIX عاسىرلاردا ەۋروپالىق جانە امەريكالىق زەرتتەۋشىلەر جاساعان قازاق مەملەكەتى كارتالارىنىڭ كورمەسىنە ۇلاستى. ەكسپوزيتسيا ورتا عاسىرلاردا ءومىر سۇرگەن شەتەلدىك عالىمداردىڭ ءبىزدىڭ ايماق تۋرالى ويلارىنان حابار بەرەدى. وسىلايشا وكسفوردتىڭ اكادەميالىق ورتاسى، ەكسپەرتتىك قاۋىمداستىعى جانە بيزنەسمەندەرى وتكەنگە رۋحاني ساياحات جاساۋعا مۇمكىندىك الدى.
