ادەيى جەڭىلۋ ءۇشىن 100 ميلليون ۇسىندى: تانىمال فايتەر قۇپياسىن اشتى
استانا. KAZINFORM - شارا بۋللەت بۇل تۋرالى جۋرناليست كارەن اداميانعا بەرگەن سۇحباتىندا ايتتى.
رەسەيلىك UFC فايتەرى شارابۋتدين ماگومەدوۆ 2024 -جىلى پولياك سپورتشىسى ميحال ولەكسەيچۋكپەن وتكەن جەكپە-جەكتە ادەيى جەڭىلۋ ءۇشىن وزىنە 100 ميلليون رۋبل ۇسىنىلعانىن مالىمدەدى.
شارا بۋللەت بۇل تۋرالى جۋرناليست كارەن اداميانعا بەرگەن سۇحباتىندا ايتتى. ونىڭ سوزىنشە، ول ۇسىنىلعان قوماقتى قارجىدان باس تارتىپ، سپورتتىق مانسابىن ءبىرىنشى ورىنعا قويعان.
«UFC-دە ءبىر جەكپە-جەگىمنىڭ الدىندا ماعان ادەيى جەڭىلۋ ءۇشىن 100 ميلليون رۋبل ۇسىندى. قارسىلاسىم پولياك ولەكسەيچۋك بولدى. ءبىراق مەن كەلىسپەدىم. ويتكەنى مانسابىم ول اقشادان الدەقايدا ماڭىزدى ەدى»، - دەدى فايتەر.
ەسكە سالايىق، ماگومەدوۆ پەن ولەكسەيچۋك اراسىنداعى جەكپە-جەك 2024 -جىلعى 3-تامىزدا ءابۋ-دابيدە وتكەن UFC on ABC 7 تۋرنيرىندە ۇيىمداستىرىلدى. ءۇش راۋندقا سوزىلعان كەزدەسۋدە رەسەيلىك سپورتشى تورەشىلەردىڭ ءبىراۋىزدان شىعارعان شەشىمىمەن جەڭىسكە جەتتى.
وسى جەكپە-جەكتەن كەيىن شارا بۋللەت UFC-دە تاعى ءتورت كەزدەسۋ وتكىزىپ، ۇشەۋىندە جەڭىسكە جەتىپ، ءبىر رەت جەڭىلىس تاپتى. قازىرگى كاسىبي رەكوردى - 17 جەڭىس، 1 جەڭىلىس.
ايتا كەتەيىك، شارابۋتدين ماگومەدوۆ كەلەسى جەكپە-جەگىن 5-جەلتوقساندا بۇرىنعى UFC چەمپيونى يسراەل ادەسانياعا قارسى وتكىزەدى. كەزدەسۋ ساۋد ارابياسىنىڭ ەر-رياد قالاسىندا وتەتىن UFC Fight Night ءۋرنيرىنىڭ باستى جەكپە-جەگى بولادى.