گايتيدەگى قىلمىسكەرلەردىڭ جارتىسى بالالار - UNICEF
استانا. KAZINFORM - گايتيدە ءبىر جىلدا قارۋلى توپتار قاتارىنا تارتىلعان بالالاردىڭ سانى 70 پايىزعا ءوستى. بۇل تۋرالى UNICEF بايانداماسىندا ايتىلعان.
گايتي ونداعان جىل بويى ساياسي تۇراقسىزدىقتى باستان وتكەردى، ءبىراق سوڭعى ايلاردا زورلىق- زومبىلىق كۇشەيە ءتۇستى. باندىلار قازىر ەل استاناسى پورت- و- پرەنستىڭ 80 پايىزىن باقىلاپ وتىر.
- 2023 -جىلدىڭ ەكىنشى توقسانى مەن 2024 -جىلدىڭ ەكىنشى توقسانى اراسىنداعى بۇرىن- سوڭدى بولماعان بۇل كورسەتكىش زورلىق- زومبىلىق كۇشەيگەن كاريب تەڭىزى ارالىنداعى بالالاردى قورعاۋ داعدارىسىنىڭ ودان ءارى تەرەڭدەي تۇسكەنىن كورسەتەدى، - دەلىنگەن UNICEF مالىمدەمەسىندە.
UNICEF بالالاردى مۇنداي جۇمىسقا تارتۋدىڭ ءوسۋىن - زورلىق- زومبىلىقتىڭ ارتۋى، كەڭ تارالعان كەدەيلىك، ءبىلىمنىڭ جەتىسپەۋشىلىگى جانە ماڭىزدى ينفراقۇرىلىمنىڭ تولىعىمەن جويىلۋىمەن بايلانىستىرىپ وتىر. سونىمەن قاتار، ۇيىم قارۋلى توپ مۇشەلەرىنىڭ جارتىسى قازىر بالالار ەكەنىن اتاپ ءوتتى.
بۇل مالىمدەمەگە UNICEF ءتىڭ اتقارۋشى ديرەكتورى كەترين راسسەل دە پىكىر قوستى.
- گايتيدەگى بالالار قاتىگەز سيكلگە ءتۇسىپ قالعان - ولار وزدەرىنىڭ قيىن جاعدايىنا ىقپال ەتەتىن قارۋلى توپتارعا قوسىلۋدا جانە ولاردىڭ سانى ارتىپ كەلەدى، - دەدى ول.
ايتا كەتەيىك، ءساۋىر ايىنىڭ باسىندا ءۇش اپتا ىشىندە 53 مىڭنان استام ادام قاتىگەز توپتىڭ، ياعني، قاراقشىلاردىڭ زورلىق- زومبىلىعىنان قۇتىلۋ ءۇشىن گايتي استاناسىن تاستاپ كەتكەن ەدى.
