گايتيدە باندىلار تۇرمەگە باسىپ كىرىپ، 4000 تۇتقىندى بوساتتى

استانا. KAZINFORM - قارۋلى توپتار كاريب تەڭىزىندەگى گايتي ارال مەملەكەتى استاناسىنداعى تۇرمەگە باسىپ كىرىپ، 4 مىڭعا جۋىق تۇتقىندى بوساتىپ الدى، دەپ حابارلايدى BBC.

ۇلتتىق تۇرمەگە شابۋىل سەنبى كۇنى كەشكە، گايتي پرەمەر-ءمينيسترى بانديتيزممەن كۇرەسۋ ءۇشىن گايتيگە حالىقارالىق كونتينگەنتتى ورنالاستىرۋ تۋرالى كەلىسسوز جۇرگىزۋ ءۇشىن كەنياعا بارعاننان كەيىن جانە باربەكيۋ لاقاپ اتى بار قاراقشىلار جەتەكشىلەرىنىڭ ءبىرى پرەمەرگە قارسى سوعىس جاريالاعاننان كەيىن بولدى.

جەكسەنبىدە تۇرمەگە شابۋىل جاسالعانى بەلگىلى بولعان كەزدە وعان حالىقارالىق اگەنتتىكتەردىڭ جەرگىلىكتى تىلشىلەرى كەلدى.

AFP اگەنتتىگىنىڭ حابارلاۋىنشا، تۇرمە قاقپالارى اشىق، ال ولاردىڭ جانىندا وننان استام ءمايىت جاتقان. Reuters اگەنتتىگى اۋلادا ءۇش تۇتقىننىڭ دەنەسى جاتقانىن حابارلادى.

گايتي بيلىگىنىڭ جاريالاۋىنشا، پوليتسيا ءبىر ۋاقىتتا وسى تۇرمەگە جانە كرۋا-دە-بۋكەت تۇرمەسىنە جاسالعان شابۋىلداردى تويتارۋعا تىرىسقان.

ەكىنشى تۇرمەدەن قانشا ادامنىڭ قاشقانى تۋرالى مالىمەت جوق، بىرىنشىسىندە تىزىمدە 3800 گە جۋىق ادام بولعان، Reuters اگەنتتىگىنىڭ مالىمەتىنشە، ونىڭ 99 ى كامەراسىندا قالعان.

اگەنتتىكتىڭ تۇرمە قىزمەتكەرلەرىنىڭ اراسىنداعى اقپارات كوزىنىڭ ايتۋىنشا، ولار وزدەرىنە وق ءتيىپ كەتپەس ءۇشىن سىرتقا شىقپاۋدى ۇيعارعان.

تۇرمەدە قالعانداردىڭ اراسىندا 2021 -جىلى شىلدەدە گايتي پرەزيدەنتى جوۆەنەل مويزانىڭ ولىمىنە قاتىسى بار دەگەن ايىپپەن تۇرمەگە قامالعان بۇرىنعى كولۋمبيالىق ساربازدار بار.

وسى كىسى ولتىرۋدەن كەيىن امەريكانىڭ ەڭ كەدەي ەلى گايتيدى انارحيا مەن بانديتيزم تولقىنى باستى.

باندىلار استانا پورت-و-پرەنستىڭ 80 پايىزىن باقىلايدى جانە 11 ميلليون حالقى بار ەلدە وتكەن جىلى 8500 گە جۋىق ادام قازا تاپتى.

 

اۆتور
زارينا تۋعانبايەۆا