ايماۋىتوۆ تەاترى ورالحان بوكەيدىڭ «كەربۇعىسىن» ساحناعا شىعاردى
پاۆلودار. KAZINFORM - پلاستيكالىق درامادا قورىقتاعى مارالدار مەن بۇعىلاردىڭ ءومىرى باياندالادى. نەگىزگى يدەيادا ادامزات جاۋىزدىعىنىڭ ۇستەمدىگى كورىنىس تاپقان.
پاۆلوداردىڭ ايماۋىتوۆ اتىنداعى قازاق مۋزىكا-دراما تەاترى بيىلعى جىلدىڭ العاشقى پرەمەراسىن ۇسىندى. پرەمەرانىڭ اتاۋى - «كەربۇعى»، ورالحان بوكەيدىڭ اتتاس اڭگىمەسىنىڭ جەلىسىمەن قويىلىپ وتىر.
جاڭا قويىلىمدا قورىقتاعى مارالداردىڭ تابيعاتپەن ەتەنە تىرشىلىگى، ولاردىڭ ادامدارعا دەگەن تىم سەنگىشتىگىنىڭ سالدارىنان قۇرباندىققا اينالۋىنىڭ جايى سيپاتتالادى.
بۇعىلار مەن مارالدار تابىنىنىڭ ادامزات الەمىنەن ۇنەمى جىلىلىق ىزدەپ، تىم سەنگىشتىگى بۇل جانۋارلاردى قۇردىمعا قۇلاتتى. كەربۇعى بۇعىلاردىڭ ىشىندە ەڭ اقىلدىسى ەدى. ول پەندە بالاسىن شەكسىز سۇيەتۇعىن. قويىلىم شىرقاۋ شەگىنە جەتكەندە مامىراجاي تىرلىك كەشىپ جۇرگەن توپ باسى - كەربۇعىنىڭ ون سەگىز سالالى ءمۇيىزىن ەل-جۇرتتان بەزىنىپ، ايدالادا جۇرگەن ادام قوڭقاي كەسىپ اكەتتى.
كەربۇعىنىڭ بار باعى - باسىنداعى ون سەگىز سالالى ءمۇيىزى ەكەن. ودان ايرىلعان ساتتەن ونى تىڭدايتىن، پارمەنىنە قۇلاق اساتىن جانۋار قالمادى. ونىڭ سوڭىن الا ۇلكەن ءبىر مارالدار اۋلەتى كۇيرەپ تىندى. قازاقتىڭ باسىنان وتكەن بارلىق قايعى-قاسىرەتتى وسى جەرگە ۇيە سالعانداي. اشتىق كورىنىسى، باقا-شايان تەرىپ كەتكەن جۇرت، سابيىنەن ايرىلعان انا، كوكىرەگى شەرگە تولعان ەرلەر... كوشباسشىدان، تامىرىنان اجىراعان ەلدىڭ بەيشارا كەيپى.
ايتىپ وتەيىك، سوڭعى ۋاقىتتا كەرەكۋلىك تەاتر پلاستيكالىق مانەرگە كوبىرەك كوڭىل ءبولىپ ءجۇر. اكتەرلەر ۇجىمىنىڭ دەنى جاستار، شەتىنەن مىڭ بۇرالعان بيشىلەر، قاجەت بولسا كۇردەلى تريۋكتەردى دە ورىندايتىنىن بايقاپ ءجۇرمىز. بۇرىن تەاتردان ادام كوڭىلىنىڭ جوعىن ىزدەپ باراتىن، ال قازىرگى كورەرمەن كوبىرەك اسەر كۇتەدى ەكەن.
دراما رەجيسسەرى جانگەلدى سادىقوۆتىڭ سوزىنشە، ادام مەن تابيعات اراسىنداعى قاراما-قايشىلىق ۇعىمدارىن جاستار قاۋىمى كەڭىنەن تۇسىنە ءبىلۋى كەرەك. ەرەسەكتەر مەن جاس ۇرپاقتىڭ زەردەسىنە ەكولوگيالىق تاربيەنى سىڭدىرۋدە مۇنداي قويىلىمداردىڭ پايداسى زور بولماق.
پرەمەرالىق قويىلىمداعى باستى رولدەردى جاسۇلان ءامىرحان، تەمىرلان مۇقاتاي سياقتى جاس اكتەرلەر سومدادى. تەاتردىڭ بەلدى ءارتىسى، ق ر مادەنيەت قايراتكەرى بەيبىت ءشانىم قوڭقاي ءرولىن ەش كىرشىكسىز ويناپ شىقتى.
اۆتور
مۇرات اياعان
