ايەلدەر مەن بالالار قۇقىعى، قۇمار ويىندى ازايتۋ، ۆەيپكە تىيىم سالۋ - بيىل پرەزيدەنت 95 زاڭعا قول قويدى
استانا. KAZINFORM - مەملەكەت باسشىسى بيىل 3979 قۇجاتتى قاراپ، قول قويدى. ونىڭ ىشىندە 95 زاڭ، 319 جارلىق، 81 وكىم، 28 وتىرىس حاتتاماسى، 3456 قىزمەتتىك قۇجات قابىلداندى. بۇل تۋرالى ق ر پرەزيدەنتىنىڭ كەڭەسشىسى - باسپا ءسوز حاتشىسى بەرىك ءۋالي Egemen Qazaqstan گازەتىندەگى ماقالاسىندا جازدى.
اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا پرەزيدەنت بەس الەۋمەتتىك كەسەلمەن كۇرەستى كۇشەيتۋ جونىندە ناقتى تاپسىرما بەردى.
- وسىعان وراي، بيىل ايەلدەردىڭ قۇقىقتارى مەن بالالاردىڭ قاۋىپسىزدىگى تۋرالى زاڭعا قول قويىلدى. ياعني تۇرمىستىق زورلىق-زومبىلىق ءۇشىن قاتاڭ جازا بەلگىلەيتىن، بالالار قۇقىعىنىڭ قورعالۋىن قامتاماسىز ەتەتىن جاڭا نورمالار ەنگىزىلدى. بۇدان بولەك، ادام ساۋداسىنا قارسى ءىس- قيمىل تۋرالى ارنايى زاڭ قابىلداندى. ۆانداليزم مەن وزگەنىڭ مۇلكىنە زيان كەلتىرگەنى، قوعامدىق ءتارتىپتى بۇزعانى ءۇشىن جاۋاپكەرشىلىكتى كۇشەيتۋگە، قۇمار ويىنعا تاۋەلدىلىكتى ازايتۋعا، ۆەيپكە تىيىم سالۋعا باعىتتالعان زاڭنامالىق وزگەرىستەر جاسالدى. اتالعان باستامالارعا قاتىستى زاڭ جوبالارىن ازىرلەۋگە پارلامەنت دەپۋتاتتارىمەن قاتار، ۇلتتىق قۇرىلتاي مۇشەلەرى دە بەلسەندى اتسالىستى. وسىلايشا، پرەزيدەنت ۇنەمى ايتاتىن «زاڭ مەن ءتارتىپ» ۇستەمدىگى قوعامدا بىرتىندەپ ورنىعىپ كەلەدى، - دەيدى پرەزيدەنت كەڭەسشىسى.
سونداي-اق، پرەزيدەنت تاپسىرماسىمەن «جايلى مەكتەپ» ۇلتتىق جوباسى اياسىندا قالالار مەن قارقىندى دامىپ كەلە جاتقان ەلدى مەكەندەردە 460 مىڭ وقۋشىعا ارنالعان جاڭا 217 مەكتەپتىڭ قۇرىلىسى جۇرگىزىلىپ جاتىر. بۇگىندە 36 مەكتەپ پايدالانۋعا بەرىلدى. ونىڭ 15 ى اۋىلدىق ەلدى مەكەندەردە ورنالاسقان.
- بۇل - ءبىلىم بەرۋ سالاسىنىڭ ينفراقۇرىلىمىن دامىتۋ ىسىندە قالا مەن اۋىلعا بىردەي كوڭىل بولىنەدى دەگەن ءسوز. ال بىرنەشە جىلدان بەرى جۇزەگە اسىرىلىپ كەلە جاتقان «اۋىلداعى دەنساۋلىق ساقتاۋدى جاڭعىرتۋ» ۇلتتىق جوباسى اياسىندا العاشقى سانيتارلىق-مەديتسينالىق كومەك كورسەتەتىن 276 نىساننىڭ قۇرىلىسى اياقتالدى. ونىڭ 99 ى 2023 -جىلى، ال 117 ى بيىل ىسكە قوسىلدى. كەلەر جىلى 125 نىساننىڭ قۇرىلىسى جۇرگىزىلەدى. ونىڭ ىشىندە 32 اۋداندىق اۋرۋحانانى جاڭعىرتۋ جۇمىستارى جالعاسىپ جاتىر، - دەيدى ب. ءۋالي.
ايتا كەتەيىك، بەرىك ءۋالي مەملەكەت باسشىسى قاسىم-جومارت توقايەۆتىڭ جىل بويى اتقارعان قىزمەتىنە شولۋ جاساپ، قوعامدىق-ساياسي ومىردەگى، الەۋمەتتىك- ەكونوميكالىق دامۋداعى ىرگەلى وزگەرىستەر مەن تابىستار تۋرالى باياندادى.
پرەزيدەنت بيىل جۇمىس ساپارىمەن ەلىمىزدىڭ 11 وڭىرىنە باردى. ايماقتارداعى 60 تان اسا وندىرىستىك جانە الەۋمەتتىك-مادەني نىساندارمەن تانىسىپ، جۇرتشىلىقپەن كەزدەستى.
اۆتور
ايجان سەرىكجان قىزى
