اكەسىنىڭ كولىگىن رۇقساتسىز ءمىنىپ كەتكەن كوكشەتاۋلىق ءۇش جاس ءوسپىرىم جول اپاتىنا ۇشىرادى

كوكشەتاۋدا جاسوسپىرىمدەر رۇقساتسىز مىنگەن اۆتوكولىك جول اپاتىنا ۇشىراپ، بىرنەشە كولىك پەن كوشە بويىنداعى جارىق باعانىنا زالال كەلدى، دەپ حابارلايدى Kazinform.

اقمولا وبلىستىق پ د باسپا ءسوز قىزمەتىنىڭ مالىمەتىنشە، جول-كولىك وقيعاسى 3- جەلتوقسان 19:30 شاماسىندا تاشەنوۆ كوشەسىنىڭ بويىندا بولعان.

انىقتالعانداي، تاشەنوۆ كوشەسىنىڭ بويىندا جىلدامدىق رەجيمىن ساقتاماعان Honda Odyssey اۆتوكولىگىنىڭ جۇرگىزۋشىسى اۆتوتۇراقتا تۇرعان Hyundai i40 كولىگىن سوققان.

قاتتى سوققىدان كولىك ورنىنان جىلجىپ، مەشىت قورشاۋىن قيراتقان.

سونىمەن بىرگە، Honda Odyssey اۆتوكولىگى قاتتى ەكپىنمەن كوشەنىڭ جارىق شامدارىنىڭ باعانىنا جانە ۆاز-2107 اۆتوكولىگىنە سوعىلعان.

كەيىن Honda Odyssey جۇرگىزۋشىسى وقيعا ورنىنان قاشىپ كەتتى. دەگەنمەن ءتارتىپ ساقشىلارى كىنالى جۇرگىزۋشىنى انىقتادى.

بەلگىلى بولعانداي، كولىكتىڭ رۋلىندەگى 16 جاسار جەرگىلىكتى تۇرعىن بولىپ شىقتى.

سونىمەن بىرگە، كولىكتىڭ سالونىندا 14 جاسار ۇل مەن 17 جاسار قىز بالا بولدى. كولىك 14 جاسار بالانىڭ اكەسىنە تيەسىلى، جاس وسپىرىمدەر كولىكتى رۇقساتسىز العان.

- قازىرگى كەزدە «Honda Odyssey» اۆتوكولىگى مامانداندىرىلعان اۆتوتۇراققا قويىلىپ، ساراپتاما تاعايىندالدى، - دەدى ۆەدومستۆودان.

ايتا كەتسەك، بۇدان بۇرىن اقمولا وبلىسىندا ارباداعى ادام جەدەل جاردەم كولىگىنىڭ استىنا ءتۇسىپ مەرت بولعانىن جازعان ەدىك.