ايەل ينتەرنەت-دۇكەندەگى تاپسىرىستارىن قايتارامىن دەپ تەمىر توردان ءبىر-اق شىقتى
استانا. KAZINFORM - جاپونيادا انيمە كەيىپكەرلەرى بەينەلەنگەن تاۋارلارىنا قايتا-قايتا تاپسىرىس بەرىپ، كەيىن ولاردى الىپ كەتپەگەن 32 جاستاعى ايەل ۇستالدى. ءۇش جىل ىشىندە ول 4,3 ميلليارد يەنگە (شامامەن 12,4 ميلليارد تەڭگە) تاۋار راسىمدەگەن.
بۇل تۋرالى Stan.kz اقپارات اگەنتتىگى SoraNews24 سايتىنا سىلتەمە جاساپ حابارلايدى.
وساكا قالاسىندا مەيرامحانادا جۇمىس ىستەيتىن مايۋ ەسيدا 4-تامىزدا قاماۋعا الىنعان. وعان الاياقتىق جاسادى جانە كومپانيانىڭ جۇمىسىنا كەدەرگى كەلتىردى دەگەن ايىپ تاعىلىپ وتىر.
تەرگەۋ دەرەكتەرىنە سۇيەنسەك، ەسيدا انيمەگە قاتتى اۋەس بولعان. 2023 -جىلعى كۇزدەن بەرى ول Shueisha باسپاسىنىڭ One Piece جانە Naruto انيمەلەرىنە ارنالعان تاۋارلارىنا 2 مىڭنان استام تاپسىرىس بەرگەن.
ايەل كەيىپكەرلەردىڭ مۇسىندەرىن، سۋرەتى سالىنعان سالپىنشاقتاردى، جۇمساق ويىنشىقتاردى جانە باسقا دا زاتتاردى ساتىپ الۋعا ءوتىنىم قالدىرعان. الايدا تاپسىرىستار جەتكىزۋ ورنىنا كەلگەننەن كەيىن ولاردى الىپ كەتپەگەن.
ءبىر ادامعا بەلگىلەنگەن تاپسىرىس شەكتەۋىن اينالىپ ءوتۋ ءۇشىن ەسيدا 238 جالعان اككاۋنت اشقان. ونىڭ ءۇش جىل ىشىندە راسىمدەگەن تاپسىرىستارىنىڭ جالپى سوماسى 4,3 ميلليارد يەنگە جەتكەن. تەرگەۋ مالىمەتىنە سايكەس، ايەلدىڭ ارەكەتىنەن باسپاعا 7,5 ميلليون يەن (شامامەن 22 ميلليون تەڭگە) كولەمىندە شىعىن كەلگەن.
ەسيدا كىناسىن مويىنداعان. ول مۇنداي ارەكەتكە كۇيزەلىستەن ارىلۋ ءۇشىن بارعانىن ايتقان. ايەلدىڭ سوزىنشە، سۇيىكتى انيمە كەيىپكەرلەرى بەينەلەنگەن تاۋارلارعا تاپسىرىس بەرۋ وعان كوڭىلىن تىنىشتاندىرىپ، بويىنداعى كۇيزەلىستى باسۋعا كومەكتەسكەن.
ەندى وعان ءۇش جىلعا دەيىن باس بوستاندىعىنان ايىرۋ جازاسى تاعايىندالۋى مۇمكىن. سونداي-اق 500 مىڭ يەنگە (شامامەن 1,5 ميلليون تەڭگە) دەيىن ايىپپۇل سالىنۋى ىقتيمال.
