ايەل قۇقى مەن بالا قاۋىپسىزدىگى: جاڭا زاڭ تۇرمىستاعى جاعدايعا قالاي اسەر ەتتى
استانا. KAZINFORM - ىشكى ىستەر مينيسترلىگى ەلىمىزدەگى وتباسىلىق جانجالدار بويىنشا قوزعالعان ىستەرگە تۇسىنىك بەردى.

- كەيىنگى 6 جىلدا قابىلدانعان ۇيىمداستىرۋ ءارى قۇقىقتىق ءىس- شارالاردىڭ ناتيجەسىندە ايەلدەردىڭ قۇقىقتارىنا قول سۇعاتىن قىلمىستار سانى ەكى ەسەگە (%47 عا، 2019 - جىلى 96337 دەن 2024 - جىلى 51057 گە دەيىن) ازايدى. ونىڭ ىشىندە ايەلدەرگە قاتىستى جاسالعان زورلىق- زومبىلىق قىلمىستارى %48 عا (2019 - جىلى 2947 دەن 2024 - جىلى 1511 گە دەيىن)، سونىڭ اراسىندا كىسى ءولتىرۋ%27 عا دەنساۋلىققا اۋىر زيان كەلتىرۋ %25 عا، ايەلدەرگە قاتىستى ورتاشا اۋىرلىقتاعى دەنە جاراقاتتارىن سالۋ %22 عا ازايدى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

ستاتيستيكالىق دەرەكتەرگە سايكەس، ۇرىپ- سوعۋ جانە دەنساۋلىققا قاساقانا زيان كەلتىرۋ قىلمىستارىنىڭ كريميناليزاتسياسىنان كەيىن، 2024 -جىلعى 12 ايدىڭ قورىتىندىسى بويىنشا (2023 - جىلدىڭ وسى كەزەڭىمەن سالىستىرعاندا) ەلدىڭ بارلىق وڭىرىندە تۇرمىستاعى قىلمىستار سانى 3,7 ەسە ارتقان (923 تەن 3371 گە دەيىن)، ونىڭ ىشىندە تەرىس قىلىقتار سانى 138 ەسە (18 دەن 2486 عا دەيىن) وسكەن.

- قۇقىق بۇزۋدىڭ وسى ءتۇرىنىڭ ءوسۋىنىڭ نەگىزگى سەبەپتەرىنە توقتالساق، بۇل - 2024 -جىلدىڭ 16- ماۋسىمىنان باستاپ ەنگىزىلگەن زاڭداعى جاڭاشىلدىقتىڭ ناتيجەسى. بۇل رەتتە، ۇرىپ - سوعۋ مەن دەنساۋلىققا جەڭىل زيان كەلتىرۋدى كريميناليزاتسيالاۋ ارقىلى مۇمكىن بولدى. ۇرىپ-سوعۋ جانە دەنساۋلىققا جەڭىل زيان كەلتىرۋ قىلمىستىق تەرىس قىلىق بولىپ سانالا باستادى. وسىلايشا، بارلىق تىركەلگەن (3371) دەرەكتىڭ 2486 سى تەرىس قىلىقتار (%74)، ياعني قىلمىستىق قۇقىق بۇزۋ رەتىندە سانالدى. سونىمەن قاتار، كريميناليزاتسيا ەنگىزىلگەننەن كەيىن، تۇرمىستاعى زورلىق-زومبىلىق سالاسىنداعى قىلمىستىق قۇقىق بۇزۋ دەرەكتەرى %2,2 عا (905 تەن 885 كە دەيىن)، ونىڭ ىشىندە اۋىر قىلمىستاردى، كىسى ءولتىرۋ %6,4 عا (125 تەن 117 گە دەيىن) ، دەنساۋلىققا اۋىر زيان كەلتىرۋ %25,5 عا (337 دەن 251 گە دەيىن)، دەنساۋلىققا ورتاشا اۋىرلىقتاعى زيان كەلتىرۋدى %12 عا (336 دان 296 عا دەيىن) تومەندەتۋگە مۇمكىندىك تۋدى، - دەپ اتالىپ وتكەن ۆەدومستۆو اقپاراتىندا.

وتباسىنداعى زورلىق-زومبىلىق قۇقىق بۇزۋ ارەكەتتەرىن ازايتۋ ءۇشىن پوليتسيا قىزمەتكەرلەرى كەلىپ تۇسكەن بارلىق وتىنىشتەر بويىنشا دەن قويۋ شارالارىن قابىلدايدى. ەسەپتى كەزەڭدە 108 مىڭ جانجالقوي اكىمشىلىك جاۋاپكەرشىلىككە تارتىلدى، ونىڭ ىشىندە 30 مىڭى (30185) قاماۋعا الىندى.
- تۇرمىستاعى زورلىق-زومبىلىق قۇرباندارىن قورعاۋ ماقساتىندا ۋچاسكەلىك پوليتسيا ينسپەكتورلارى 85 مىڭ قورعاۋ نۇسقاماسىن شىعاردى. پوليتسيانىڭ ءوتىنىشى بويىنشا سوتتار قۇقىق بۇزاتىن ادامداردىڭ مىنەز- قۇلقىنا 18 مىڭ ەرەكشە تالاپ ورناتتى. بارلىعىندا باقىلاۋ ىستەرى جۇرگىزىلىپ، پوليتسيانىڭ كۇشەيتىلگەن باقىلاۋى بەلگىلەندى، - دەپ ءتۇسىندىردى مينيسترلىك ماماندارى.
ەسكە سالساق، بىلتىر ءساۋىر ايىندا پرەزيدەنت ايەل قۇقىعى مەن بالالاردىڭ قاۋىپسىزدىگىن قامتاماسىز ەتەتىن زاڭدارعا قول قويدى.