اۋىل شارۋاشىلىعىمەن شۇعىلدانام دەۋشىلەردى مەيلىنشە كوبەيتۋ كەرەك

استانا. KAZINFORM - اۋىل شارۋاشىلىعى ءونىمىن وڭدەۋمەن بەلسەندى تۇردە اينالىسۋ كەرەك، ديقاندارعا جان-جاقتى قولداۋ كورسەتكەن ءجون. بۇل تۋرالى پرەزيدەنت قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسىندا ايتتى.

«مەن بىلتىرعى جولداۋىمدا وسى سالاعا قاتىستى ناقتى تاپسىرما بەردىم. ءۇش جىلدا اگروونەركاسىپ سالاسىنداعى وڭدەلگەن ءونىمنىڭ ۇلەسىن 70 پايىزعا جەتكىزۋ مىندەتى قويىلدى. بۇل باعىتتا اۋىز تولتىرىپ ايتارلىقتاي جۇمىس جاسالىپ جاتقان جوق»، - دەدى قاسىم-جومارت توقايەۆ.

پرەزيدەنتتىڭ پىكىرىنشە، قازىرگى تاڭدا تەك شيكىزات وندىرىسىنە عانا سەنىپ وتىرۋعا بولمايدى. اۋىل شارۋاشىلىعى ءونىمىن وڭدەۋمەن بەلسەندى تۇردە اينالىسۋ كەرەك.

«ۇكىمەت وسى ماسەلەگە ايرىقشا نازار اۋدارۋعا ءتيىس. اۋىل شارۋاشىلىعىمەن شۇعىلدانام دەۋشىلەر سانىن مەيلىنشە كوبەيتۋ كەرەك. داقىل ءتۇرىن كوبەيتىپ، ەگىننىڭ شىعىمىن ارتتىرىپ جاتقان ديقاندارعا جان-جاقتى قولداۋ كورسەتكەن ءجون. سونداي-اق، ءبىرىڭعاي جەر سالىعىن قولدانۋ ماسەلەسىن قايتا قاراستىرۋ قاجەت. سەبەبى، ءىس جۇزىنە كەلگەندە، ءبىراز تۇيتكىلدەر بار. نەگىزگى تالاپ - سالىق تولەۋدى جەڭىلدەتۋ عانا ەمەس. ەڭ باستىسى، شارۋالار جەردى ءتيىمدى پايدالانىپ، بارىنشا مول ءونىم بەرۋگە ۇمتىلۋى كەرەك»، - دەدى مەملەكەت باسشىسى.

سونىمەن بىرگە، مەملەكەتتىك قولداۋ شارالارىن «ءبىر تەرەزە» قاعيداسىمەن جۇزەگە اسىرۋ قاجەت، ياعني سالالىق قارجى ينستيتۋتتارىنىڭ قىزمەتىن ءبىر جەرگە بىرىكتىرگەن ءجون.

اگرارلىق نەسيە كورپوراتسياسىنىڭ الەۋەتىن ارتتىرىپ، وعان اكىمدىكتەردىڭ اۋىل شارۋاشىلىعىن سۋبسيديالاۋ قۇزىرەتىن بەرۋ قاجەت. ول ءۇشىن اگروونەركاسىپ كەشەنى سۋبەكتىلەرىنە جەڭىلدەتىلگەن نەسيە جانە سۋبسيديا بەرۋ قىزمەتتەرىن ءبىرىڭعاي تسيفرلىق پلاتفورماعا بىرىكتىرۋ كەرەك.

«جالپى، اگروونەركاسىپ كەشەنىنە اۋقىمدى رەفورما جاسالۋعا ءتيىس. ناقتى ايتقاندا، جاڭا تەحنولوگيالاردى ەنگىزىپ، جەردى جانە باسقا رەسۋرستاردى ۇتىمدى پايدالانىپ، جەڭىلدىكتەر مەن سۋبسيديالاردىڭ تيىمدىلىگىن ارتتىرۋ قاجەت. مۇنىڭ ءبارى، تۇپتەپ كەلگەندە، اۋىل شارۋاشىلىعىنداعى ەڭبەكتىڭ ونىمدىلىگىن ارتتىرادى، ياعني ناقتى ناتيجە بەرەدى»، - دەدى قاسىم-جومارت توقايەۆ.

اۆتور
ايجان سەرىكجان قىزى