اۋىل شارۋاشىلىعى وندىرۋشىلەرىنە بەرىلەتىن سۋبسيديا كولەمى ءوستى

  وزەكتى ماسەلەلەردىڭ ءبىرى-اگروونەركاسىپتىك كەشەن سۋبەكتىلەرىنىڭ اۋىل شارۋاشىلىعى تەحنيكاسىن ساتىپ الۋعا جۇمساعان شىعىستارىن وتەۋ.

سەبەبى، بۇل شىعىنداردى سۋبسيديالاۋ ءۇشىن قۇن ليميتتەرى ينفلياتسياعا جانە قازاقستان نارىعىنا جەتكىزىلەتىن اۋىل شارۋاشىلىعى تەحنيكاسى باعاسىنىڭ ايتارلىقتاي وسۋىنە قاراماستان بىرنەشە جىل بويى قايتا قارالماعان، دەپ حابارلايدى Kazinform.

وسىعان بايلانىستى، باس پروكۋراتۋرانىڭ باستاماسىمەن ۋاكىلەتتى ورگان سۋبسيديالاردى ەسەپتەۋ ءۇشىن شەكتى جول بەرىلەتىن قۇندى جانە نارىقتاعى قولدانىستاعى باعالارعا بايلانىستى نورماتيۆتەردى ناقتىلادى.

«مىسالى، دوڭعالاقتى تراكتورلاردىڭ ەڭ جوعارى قۇنى قوزعالتقىشتىڭ قۋاتىنا بايلانىستى 7 دەن 204 ميلليون تەڭگەگە دەيىن (بۇرىن 4 تەن 105 ميلليون تەڭگەگە دەيىن بولعان) ەكى ەسەگە ۇلعايتىلدى.

«اۋىل شارۋاشىلىعى تەحنيكاسىن، ماشينالارى مەن جابدىقتارىن ساتىپ الۋ» جوباسىنىڭ پاسپورتى بويىنشا قۇندىق ليميتتەر اۋىل شارۋاشىلىعى تەحنيكاسىنىڭ 35 پوزيتسياسى بويىنشا جاڭارتىلدى.

«باسىمدى اۋىل شارۋاشىلىعى ماشينالارى مەن جابدىقتارىن ساتىپ الۋ» پاسپورتىنا تەحنيكانىڭ 23 ءتۇرى قوسىلدى (تراكتور تىركەمەلەرى، سەپكىشتەر، ەگىس كەشەندەرى، ءشوپ شاباتىن ماشينالار، بۇرىككىشتەر جانە ت. ب. ).

قانت قىزىلشاسىن ءوندىرۋ تەحنيكاسى بويىنشا قانت سالاسىن دامىتۋ باعدارلاماسى شەڭبەرىندەگى نورماتيۆ رۇقسات ەتىلگەن قۇنى 160 ميلليون تەڭگەمەن (بۇرىن 80 ميلليون تەڭگەنى قۇراعان) %25 دان %50 عا دەيىن ۇلعايتىلدى.

ەنگىزىلگەن وزگەرىستەر فەرمەرلەردىڭ وندىرىستەردى جانە ماشينا- تراكتور پاركىن جاڭارتۋعا قولجەتىمدىلىگىن ەداۋىر ارتتىرادى»، - دەپ جازدى باس پروكۋراتۋرادان.

اتالعان جانە باسقا دا يننوۆاتسيالار اعىمداعى جىلعى 10-جەلتوقساندا كۇشىنە ەنەدى.

ولاردى قولدانۋ ماسەلەلەرى بويىنشا ۋاكىلەتتى ورگان - اۋىل شارۋاشىلىعى مينيسترلىگىنە، ال بيزنەس سۋبەكتىلەرىنىڭ قۇقىقتارى بۇزىلعان جاعدايدا - پروكۋراتۋرا ورگاندارىنىڭ بيزنەستى جانە ينۆەستورلاردى قورعاۋ جونىندەگى Call-ورتالىقتارىنا (تەلەفون نومىرلەرى پروكۋراتۋرا سايتتارىندا كورسەتىلگەن) جۇگىنۋ قاجەت.