ايەل باسقاراتىن كومپانيالاردىڭ قارجىلىق جاعدايى جاقسىراق بولادى - زەرتتەۋ

استانا. KAZINFORM - باسشىلىق قۇرامىندا ايەلدەردىڭ ۇلەسى تەڭگەرىمدى كومپانيالار قارجىلىق جاعىنان جاقسى ناتيجەلەرگە جيىرەك قول جەتكىزەدى. مۇنداي ۇيىمداردا قىزمەتكەرلەردى جۇمىسقا تارتۋ جانە ساقتاپ قالۋ مۇمكىندىگى دە جوعارى بولۋى مۇمكىن. بۇل تۋرالى Grant Thornton حالىقارالىق كونسالتينگ كومپانياسىنىڭ Women in Business 2026 زەرتتەۋىندە ايتىلعان.

әйел
Фото: turkystan.kz

زەرتتەۋشىلەر باسشىلىق قىزمەتتەگى گەندەرلىك تەڭدىكتى قولدايتىن ورتا بيزنەس كومپانيالارىنىڭ تابىسى مەن قىزمەتكەرلەر سانى جيىرەك وسەتىنىن انىقتاعان.

ماسەلەن، گەندەرلىك تەڭدىك باستامالارىن جالعاستىرىپ، جاڭالارىن ەنگىزۋدى جوسپارلاعان كومپانيالاردىڭ 73 پايىزىندا جىلدىق تابىس 5 پايىزدان استام وسكەن. ال 56,2 پايىزى قىزمەتكەرلەر سانىن، 48,8 پايىزى ەكسپورت كولەمىن ارتتىرعان.

ا ق ش-تا ساۋالناماعا قاتىسقان كومپانيالاردىڭ 22 پايىزى گەندەرلىك تەڭدىككە باعىتتالعان شارالار قارجىلىق كورسەتكىشتەرىنىڭ جاقسارۋىنا ىقپال ەتكەنىن ايتقان. الەمدىك كورسەتكىش 19 پايىزدى قۇرايدى.

زەرتتەۋ سونداي-اق ينۆەستورلاردىڭ كومپانيا باسشىلىعىنداعى ايەلدەر مەن ەرلەردىڭ اراقاتىناسىنا كوبىرەك نازار اۋدارا باستاعانىن كورسەتتى. ا ق ش-تاعى كاسىپورىنداردىڭ 36 پايىزىنان ينۆەستورلار وسىعان قاتىستى مالىمەت نەمەسە گەندەرلىك تەڭدىكتى جاقسارتۋ جوسپارىن سۇراعان.

بۇل ءۇردىس جۇمىس ىزدەۋشىلەر اراسىندا دا بايقالادى. امەريكالىق رەسپوندەنتتەردىڭ 82 پايىزى جاڭا قىزمەتكە ورنالاساردا كومپانيانىڭ تەڭ مۇمكىندىكتەر جاساۋعا قانشالىقتى ءمان بەرەتىنىن ەسكەرەتىنىن ايتقان.

ساراپشىلاردىڭ پىكىرىنشە، باسشىلىق قۇرامىندا ءارتۇرلى تاجىريبەسى مەن كوزقاراسى بار ادامداردىڭ بولۋى شەشىم قابىلداۋ ساپاسىن جاقسارتىپ، جاڭا يدەيالاردىڭ پايدا بولۋىنا ىقپال ەتۋى مۇمكىن. ال قىزمەتكەرلەردىڭ ەڭبەگىن باعالاۋ جانە مانساپتىق وسۋگە تەڭ مۇمكىندىك بەرۋ ۇجىمداعى سەنىمدى نىعايتۋعا كومەكتەسەدى.

ءبىر قىزىعى، مۇنداي ارتىقشىلىقتارعا قاراماستان، ا ق ش كومپانيالارىنداعى جوعارى باسشىلىق قىزمەتتەردە ايەلدەردىڭ ۇلەسى ازايىپ بارادى. 2024 -جىلى بۇل كورسەتكىش 35 پايىز بولسا، 2025 -جىلى 34 پايىزعا، ال 2026 -جىلى 31 پايىزعا تومەندەگەن.

دەگەنمەن زەرتتەۋ ايەل باسشىنىڭ بولۋى كومپانيا تابىسىن مىندەتتى تۇردە ارتتىراتىنىن نەمەسە قىزمەتكەرلەردىڭ جۇمىستان كەتۋىن تىكەلەي ازايتاتىنىن دالەلدەمەيدى. نەگىزگى قورىتىندى - باسشىلىقتاعى گەندەرلىك تەڭگەرىم مەن ونى قولداۋعا باعىتتالعان ساياسات كومپانيانىڭ ءوسىمى جانە مامانداردى تارتۋ مۇمكىندىگىمەن بايلانىستى.

زەرتتەۋشىلەردىڭ پىكىرىنشە، كومپانيانىڭ تابىستى بولۋى ءۇشىن باسشىنىڭ جىنىسىنان گورى ءارتۇرلى كوزقاراستاردى ەسكەرۋ، قابىلەتتى ماماندارعا تەڭ مۇمكىندىك بەرۋ جانە ۇجىمداعى سەنىمدى قارىم-قاتىناس ماڭىزدى.