اۋىل بالاسى دا تەگىن سەكسياعا قاتىسادى

اۋىلداعى قارادومالاقتار دا تەگىن سپورت ۇيىرمەلەرىنە بارادى. تۋريزم جانە سپورت مينيسترلىگى وسىنداي قۇجات ازىرلەپ جاتىر.

وسىلايشا، 2021-جىلى پرەزيدەنت تاپسىرماسىمەن پيلوتتىق رەجيمدە قولعا الىنعان جان باسىنا شاققانداعى قارجىلاندىرۋ باعدارلاماسى اۋىلعا دا باراتىن بولدى.

سالاعا بولەتىن قارجى دا جىل ساناپ ۇلعايا تۇسپەك. قازىر مىڭداعان قازاقستاندىق وقۋشى تەگىن سپورت سەكسيالارى مەن شىعارماشىلىق ۇيىرمەلەرگە بارىپ ءجۇر. الايدا، قوعام بەلسەندىسى قۋات ەرعاليەۆ جان باسىنا شاققانداعى قارجىلاندىرۋ باعدارلاماسىنا بولىنەتىن قاراجاتتى ۇلعايتۋ قاجەت دەپ ەسەپتەيدى. فۋتبول مامانىنىڭ ايتۋىنشا، ءالى دە كەزەگىن كۇتىپ جۇرگەن بالالار بار.

قۋات ەرعاليەۆ، قوعام بەلسەندىسى:

- 23- جىلى 91 ميلليارد تەڭگە ءبولىندى قازاقستان بويىنشا. ءبىراق، مەن ويلايمىن پولنوستيۋ، 100 پايىز الۋ ءۇشىن 250 ميلليارد پا، سولاي كەرەك.

قازىر ءبىز مىسالى استانادا 52 مىڭ بالا بارىپ جاتىر. كەزەكتە سپورت بويىنشا 14 مىڭ، ال مادەنيەت جاعىنا 12 مىڭ بالا. سونىمەن قاتار، قوعام بەلسەندىسى باعدارلاما قالالىق جەرمەن شەكتەلمەۋى كەرەك دەيدى. اۋىلدىڭ بالالارى دا بۇل جوبانىڭ شاراپاتىن كورۋى ءتيىس.

ارينە، جاۋاپتى مينيسترلىك تە قاراپ وتىرعان جوق. 2021 -جىلدان بەرى قالادا تۇراتىن مىڭداعان بالا بوس ۋاقىتىن ءتيىمدى وتكىزۋ مۇمكىندىگىنە يە بولدى. ال كەلەسى جىلدان باستاپ اۋىلداعى قارادومالاقتار تەگىن سەكسياعا قاتىسپاق.

مەيرامعازى ساپارعاليەۆ، ق ر ت س م سپورت جانە دەنەشىنىقتىرۋ ىستەرى كوميتەتىنىڭ رەسمي وكىلى:

- قازىرگى كەزدە جاڭاعى بۇيرىققا وزگەرتۋلەر ەنگىزىلىپ جاتىر. بۇل - قالالىق جانە اۋىلدىق جەرلەردەگى جان باسىنا شاققانداعى قارجىلاندىرۋ دەپ ەكى توپقا ءبولۋ. ءبىز ەندى پيلوتتىق جوبا بولىپ باسىندا باستالدى عوي. قالالىق جەرلەردە، ونىڭ ۇستىنە ۇلكەن مەگاپوليستەردە نەگىزگە الىندى ەڭ باسىندا. ءسويتىپ، قازاقستاننىڭ قازىر بارلىق ايماقتارى قامتىلىپ كەلە جاتىر. وسىلايشا، ءبىز ەندى بۇكىل اۋىل- ايماقتىڭ ءوزىن قامتاماسىز ەتسەك دەگەن الدىعا ماقسات قويىپ وتىرمىز.

جان باسىنا شاققانداعى قارجىلاندىرۋ باعدارلاماسى - مەملەكەتتىك تاپسىرىس. استانا قالاسىندا ەكى جىل بويى «ارتسپورت» پلاتفورماسى قىزمەت كورسەتىپ كەلدى. بيىلعى جىلدىڭ باسىنان باستاپ بۇل مىندەت تاپسىرىستى جەڭىپ العان «دامۋ بالا» پلاتفورماسىنا جۇكتەلدى. الايدا، اقشا جۇرگەن جەردە جۇمىرتقادان ءجۇن قىرىققان پىسىقتار دا جۇرەتىنى بەلگىلى. ماسەلەن، كەلمەگەن بالانى كەلدى دەپ كورسەتىپ، مەملەكەتتىڭ اقشاسىن تالان- تاراجعا سالعاندار دا بولدى.

ازامات اعزاموۆ، استانا قالاسىنىڭ دەنە شىنىقتىرۋ جانە سپورت باسقارماسىنىڭ ءبولىم باسشىسى:

- بۇرىندارى تەك قانا لوگين-پارولمەن بولعان سوڭ سونداي فاكتىلەر بولدى. كەلمەگەن بالاعا قول قويىلىپ، قاراجات العان. قۇزىرەتتى ورگاندارمەن تەكسەرىس جۇرگىزىلىپ، وزدەرىنىڭ شەشىمدەرى جەتكىزىلدى. ەندى، قازىرگى كۇنى تەك قانا ە س پ- مەن. ياعني، اتا-انا ەلەكتروندى تابەل تولتىرادى. قارجى دا سول تابەلگە سايكەس تولەنەدى.

قازىر استانادا 30 سپورت تۇرىنەن 945 سەكسيا جۇمىس ىستەيدى. ەسكەرەتىن ءبىر ماسەلە - ءبىر بالا ءبىر عانا سەكسياعا نەمەسە ۇيىرمەگە تەگىن قاتىسا الادى. وسىلايشا، مينيسترلىك كەلەسى جىلى دا ەل كولەمىندە جارتى ميلليوننان استام بالانى قامتۋدى كوزدەپ وتىر.

اۆتورلارى: نۇرقانات قاناپيا، دياس قوبىلانبايەۆ

www.24.kz