«اۋىل اماناتى»: اتىراۋ وبلىسىندا 192 جوباعا قارجى بەرىلگەن
اتىراۋ. KAZINFORM - بىلتىر اتىراۋ وبلىسىندا «اۋىل اماناتى» باعدارلاماسىنا قاتىسۋشىلاردىڭ 192 جوباسىنا قارجى بەرىلگەن.
اتىراۋ وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى امانگەلدى سالاماتتىڭ مالىمەتىنە سۇيەنسەك، بيىل قوسالقى شارۋاشىلىقتى دامىتۋ ءۇشىن 83 جوبانى قارجىلاندىرۋ جوسپارلانعان. سونداي-اق، اۋىل شارۋاشىلىعى كووپەراتيۆتەرىنە جەڭىلدەتىلگەن نەسيە بەرىلەدى.
«بىلتىر «اۋىل اماناتى» باعدارلاماسى اياسىندا اۋىلدارعا قوسالقى شارۋاشىلىقتى دامىتۋعا باعىتتالعان 192 جوبا قارجىلاندىرىلدى. سونىڭ ناتيجەسىندە جۇمىسسىز جۇرگەن 36 ادامنىڭ كاسىبىن باستايتىنى، جاڭادان 199 جۇمىس ورنىن اشۋ كوزدەلگەن ەدى. قازىر 40 جاڭا جۇمىس ورنى قۇرىلىپ، مىندەتتى تولەمدەرى تولەندى. ال، نەسيە الۋشىلاردان قايتارىلعان قارجىنى 1 كووپەراتيۆ پەن 10 شاعىن كاسىپ يەسىنە بەرۋ پروتسەدۋراسى ءجۇرىپ جاتىر. جوبا اياسىندا 908 ءىرى قارا، 1010 جىلقى جانە 1215 قوي ساتىپ الىندى»، - دەيدى امانگەلدى سالامات.
ونىڭ ايتۋىنشا، قوسىمشا جوبالاردى جۇزەگە اسىرۋ ءۇشىن اۋىل شارۋاشىلىعى مينيسترلىگىنە بيۋدجەتتىك ءوتىنىم جولدانعان.
پرەمەر- ءمينيستردىڭ كەڭەسشىسى ەرالى توعجانوۆتىڭ پىكىرىنشە، اۋىل شارۋاشىلىعى ونىمدەرىنىڭ كولەمىن كەڭەيتۋ قاجەت. بۇل ءۇشىن جەرگىلىكتى ءىرى كومپانيالارمەن قويان- قولتىق جۇمىس جاساۋعا قادام جاساعان ءجون.
«ماسەلەن، باتىس قازاقستان وبلىسىندا اۋىل شارۋاشىلىعى ونىمدەرىنە سۇرانىستى ارتتىرۋ ءۇشىن اكىمدىك پەن «قاراشىعاناق» كومپانياسى اراسىندا مەموروندۋمعا قول قويىلدى. اتىراۋدا دا وسىنداي مۇمكىندىك بار دەپ ويلايمىن. سەبەبى، مۇندا «تەڭىزشيەۆرويل»، NCOC جانە وتاندىق مۇناي كومپانيالارى بار. اۋىل شارۋاشىلىعى ونىمدەرىن حالىقارالىق ستاندارتقا سايكەستەندىرىپ، ءىرى مەكەمەلەرگە ۇسىنۋ قاجەت. بۇل - يمپورت كولەمىن ازايتاتىن ءتيىمدى جول»، - دەدى ەرالى توعجانوۆ.
ەسكە سالا كەتەلىك، بۇدان بۇرىن اتىراۋ وبلىسىنىڭ فەرمەرلەرى نەسيەگە ءتورت تۇلىك بەرۋ جوباسىن قولداعان ەدى.
