ايدا ءۇي سالىنادى
ادامزات ايدا ءۇي سالۋدى جوسپارلاپ وتىر. قۇرىلىس ماتەريالدارىنا ايدىڭ توپىراعى قولدانىلادى.

ۇيگە كەرەك كىرپىشتى 3D تەحنولوگياسىمەن باسىپ شىعارىپ، اي بەتىندە ءومىر سۇرۋگە ىڭعايلى ۇيلەر سالىنادى.
BGR تەحنولوگيالىق سايتىندا NASA اگەنتتىگىنىڭ 2040 -جىلعا قاراي ايدا ءۇي سالۋ تۋرالى ماقالا جاريالاندى. امەريكالىقتاردىڭ ۇلكەن جوسپارلارى بار ەكەن. Aikyn.kz العاش ادامنىڭ اياعى تيگەن ايدىڭ بەتىنە ەندى 51 جىلدان كەيىن ءۇي سالۋداعى امەريكالىقتاردىڭ ماقساتىن تالدايدى.

امەريكالىق عارىش اگەنتتىگى 50 جىلدان استام ۋاقىتتان بەرى العاش رەت ادامداردى ايعا قايتا قوندىرۋدى جوسپارلاپ قانا قويماي، ەندى 2040 -جىلعا قاراي ايدا ءۇي سالۋ جوسپارلارىمەن ءبولىستى.
بۇل وسى ونجىلدىقتا ادامداردىڭ اي بەتىنە قايتا ورالۋ پەرسپەكتيۆاسى ءۇشىن ۇلكەن قادام. 2040 -جىلعا 17 جىلدان از ۋاقىت قالعانىن ەسكەرسەك، NASA جىلدام ارەكەت ەتۋدى قازىردەن باستاۋى كەرەك.
بۇكىل جوسپار ايداعى ۇيلەردى قۇرۋ ءۇشىن 3D تەحنولوگياسىمەن باسىپ شىعارۋعا بولاتىن قۇرىلىس ماتەريالىن جاساۋمەن جانە اي توپىراعىن پايدالانۋمەن بايلانىستى بولىپ تۇر. اگەنتتىكتىڭ جوسپارلارى The New York Times گازەتىندە جاريالاندى. ءبىراق NASA جەردىڭ سپۋتنيگىندە ۇيلەردى تەك زەرتتەۋلەرگە عانا ەمەس، بەيبىت تۇرعىنداردىڭ ءومىر ءسۇرۋى ءۇشىن قاۋىپسىز بولعانىن دا قالايدى.

عاجايىپ جوسپاردى جۇزەگە اسىرۋ ءۇشىن NASA 3D باسپا ۇيلەرىنە ماماندانعان وستيندە (تەحاس شتاتى) ورنالاسقان ICON قۇرىلىس تەحنولوگياسى كومپانياسىمەن بىرىگىپ جۇمىس ىستەي باستادى. كومپانيا 2020 -جىلى NASA-دان قارجىلاندىرۋدىڭ ءبىرىنشى كەزەڭىندە جانە عارىشتىق قۇرىلىستىڭ كەلەسى دەڭگەيىن زەرتتەۋگە 2022 -جىلى قوسىمشا 60 ميلليون دوللار الدى.
ايداعى بار زاتتاردى پايدالانۋ يدەياسى جاڭا ەمەس جانە بۇنداي زەرتتەۋلەر مارستا قۇرىلىس جاساۋدىڭ بىرەگەي جولدارىن تابۋعا ۇقساس. جەردەن 384400 شاقىرىمدا ورنالاسقان سپۋتنيكتە بار رەسۋرستار مەن شاڭدى پايدالانۋدىڭ سەنىمدى جولى تابىلسا، ايدا ءۇي سالۋ الدەقايدا مۇمكىن جانە ۇنەمدى بولار ەدى.
بۇل يدەيا ايدا 2040 -جىلى العاشقى قۇرىلىس باستالۋى مۇمكىن قىزىقتى يدەيا. ارينە، مۇنىڭ ءبارى عارىش اگەنتتىگىنىڭ ماقساتتارىنىڭ بارلىق كەزەڭدەرىنىڭ جوسپارلى ىسكە اسۋىنا بايلانىستى. ول ءۇشىن كوپ ەڭبەك پەن ساتتىلىكتىڭ ارقاسىندا مۇمكىن بولادى.

قوسىمشا انىقتاما
بۇگىنگە دەيىن ايدىڭ بەتىنە 12 امەريكالىق استروناۆتىڭ تابانى تيگەن. 1969 -جىلى 21-شىلدەدە اپوللون-11 ەكسپەديتسياسىن باسقارعان نيل ارمستونگ مەن بازز ولدريننەن كەيىن، ا ق ش ايعا 5 ءساتتى ەكسپەديتسيا جىبەردى.
سوڭعى ەكسپەديتسيا 1972 -جىلدىڭ 11-14-جەلتوقسانىندا 75 ساعاتقا سوزىلدى. استروناۆتار يۋدجين سەرنان مەن حارريسون شميتت وسىنشا ۋاقىت ايدىڭ بەتىندە بولىپ، 22 ساعات زەرتتەۋلەر جۇرگىزىپ، ىزدەرىن قالدىردى.
ودان كەيىن ايدىڭ بەتىن باسقان ادام بالاسى بولعان ەمەس. ەندى 51 جىلدان كەيىن ايعا ءۇيدى العاش بولىپ تاعى دا امەريكالىقتار سالماقشى. ساتتىلىك تىلەيىك!