ايدا بالايەۆا تانىمال قازاقستاندىق ورىنداۋشىلاردىڭ زاڭسىز ارەكەتتەرى تۋرالى ايتتى

استانا. KAZINFORM - ق ر مادەنيەت جانە اقپارات ءمينيسترى ايدا بالايەۆا ەلىمىزدەگى بەلگىلى مادەنيەت قايراتكەرلەرىنىڭ ۇستالۋىنا قاتىستى كەيىنگى وقيعالارعا قاتتى الاڭداۋشىلىق ءبىلدىردى.

مينيستر الەۋمەتتىك جەلىدەگى جازباسىندا زاڭدى جانە قوعام الدىنداعى مادەني جاۋاپكەرشىلىكتى قۇرمەتتەۋدىڭ ماڭىزدىلىعىن اتاپ ءوتتى.

- قۇرمەتتى دوستار! قوعامدى قارىشتاپ وسىرەتىن دە، تۇقىرتىپ وشىرەتىن دە - مادەنيەت. مادەنيەت تەك ونەر مەن ءبىلىم، وزات تالعام مەن تازالىك ەمەس. بۇل، ەڭ الدىمەن، ادامنىڭ ىشكى رۋحانياتى، حالىقتىڭ وركەنيەتتىك بولمىسى. ەندەشە، سول مادەنيەتتىڭ تۋىن كوتەرىپ، ونەردىڭ تاسىن ورگە دومالاتىپ جۇرگەن ءاربىر مايتالمان - ەلگە ۇلگى، قوعامعا باعدار بولۋى شارت. وكىنىشكە قاراي، كەيىنگى كەزدە مادەنيەت سالاسىنداعى بەلگىلى ازاماتتارعا قاتىستى جاعىمسىز وقيعالار، كەيدە ءتىپتى زاڭسىز ارەكەتتەر جيىلەپ كەتتى. ارينە، جەكە-دارا ادام رەتىندە، قاراپايىم ازامات رەتىندە كىمگە بولسا دا پەندەشىلىك ءتان قاسيەت. ادام بولعان سوڭ قاتەلەسۋىڭ مۇمكىن، ءبىراق ونىڭ ارتى زاڭدى اتتاۋعا بارماۋى ءتيىس. ءوزىن ناعىز «مادەنيەت قايراتكەرىمىن» دەيتىن جان ءۇشىن تانىمالدىق زاڭسىزدىققا جول بەرەتىن قۇدىرەت ەمەس. ولار قاشاندا ۇلت مادەنيەتى دامۋىنىڭ قوزعاۋشى كۇشى سانالادى. سوندىقتان ولاردىڭ كوپكە ىقپالى تەك ونەگە، ناسيحات، جاقسىلىققا ارقاۋ بولۋى كەرەك، دەپ جازدى ايدا بالايەۆا Facebook-تەگى پاراقشاسىندا.

مينيستر مادەنيەت قايراتكەرلەرىنىڭ قوعام الدىنداعى، اسىرەسە وسكەلەڭ ۇرپاق الدىنداعى جاۋاپكەرشىلىگىن ءتۇسىنۋى كەرەكتىگىن ەسكە سالدى.

- مادەنيەت قايراتكەرلەرى زاڭ مەن ۇرپاق الدىنداعى وسىناۋ ۇلكەن جاۋاپكەرشىلىگىن ءتۇسىنۋى كەرەك. بۇل مەملەكەت باسشىسىنىڭ بارشا قازاقستاندىقتاردان تالاپ ەتىپ وتىرعان بىرەگەي ۇندەۋى. لاۋازىمىنا، تانىمالدىلىعىنا، قوعامداعى ورنىنا قاراماستان، زاڭ بارىنە ورتاق. ال، مەملەكەت وسى قاعيدانىڭ مۇلتىكسىز ورىندالۋىن قامتاماسىز ەتەتىن بولادى. ءسوز جوق، ۇلى ابايدان بەرى كەلە جاتقان قوعامداعى ناداندىقپەن كۇرەستىڭ الدىڭعى شەبىندە مادەنيەت مايتالماندارى ءجۇرۋى ءتيىس. وسى ورايدا مەن بارشامىزدى وسىنى ۇمىتپاۋعا شاقىرامىن. ءبىز قۇقىقتىق ءتارتىپ پەن ءوزارا قۇرمەتكە نەگىزدەلگەن ءارى مادەني قۇندىلىقتارىمىزدى قاستەر تۇتاتىن قوعامدى بىرگە قۇرا الامىز. جانە بۇل ءبىزدىڭ بولاشاعىمىزدىڭ بەرىك نەگىزى بولا الادى دەپ سەنەمىن، - دەدى ا. بالايەۆا.

وسىعان دەيىن كولىكتەگى پوليتسيا دەپارتامەنتى قايرات نۇرتاستىڭ ۇستىنەن «الماتى- استانا» اۋە رەيسىندە ۇساق بۇزاقىلىق جانە دەنساۋلىققا قاساقانا جەڭىل زيان كەلتىرۋ فاكتىسى بويىنشا اكىمشىلىك ءىس قوزعالعانىن حابارلاعان ەدى.

استانا قالاسىنىڭ اكىمشىلىك ىستەر بويىنشا مامانداندىرىلعان سوتى تانىمال ءانشىنىڭ ءىسىن ونلاين قارادى جانە سول جەردە قايرات نۇرتاس مالىمدەمە جاسادى.

كەيىن سوتتىڭ قاۋلىسىمەن قايرات نۇرتاس 15 تاۋلىككە قاماۋعا الىندى.

سونداي-اق بەلگىلى قازاقستاندىق ءانشى ءابدىجاپپار ءالقوجا ءتارتىپ ساقشىسىنىڭ زاڭدى تالاپتارىنا باعىنباعانى ءۇشىن الماتى وبلىستىق سوتىنىڭ شەشىمىمەن 10 تاۋلىككە قاماۋعا الىندى.