ايدا بالايەۆا ق. بيشىمبايەۆتىڭ سوتىنا تىلشىلەردىڭ كىرگىزىلمەۋىنە قاتىستى پىكىر ءبىلدىردى

استانا. KAZINFORM – ق ر مادەنيەت جانە اقپارات ءمينيسترى ايدا بالايەۆا بۇقارالىق اقپارات قۇرالدارى وكىلدەرىنىڭ قۋاندىق بيشىمبايەۆتىڭ ىسىنە قاتىستى سوت وتىرىسىنا نەلىكتەن جىبەرىلمەگەندىگى جونىندە پىكىر ءبىلدىردى.

ءمينيستردىڭ ايتۋىنشا، ۆەدومستۆو ءارقاشان جۋرناليست قۇقىن شەكتەۋگە جول بەرمەۋ، اقپاراتقا ەركىن قول جەتكىزۋدى قامتاماسىز ەتۋ جانە وبەكتيۆتى اقپارات تاراتۋ ۇستانىمىن بەرىك ساقتايدى. بۇل رەتتە كەشەگى سوت وتىرىسىندا ارنايى ورىننىڭ بولماۋىنا بايلانىستى ب ا ق وكىلدەرى سوت وتىرىسىن بەلگىلەنگەن بولەك بولمەدە وتىرىپ كوردى.

«الايدا ب ا ق وكىلدەرىنە ءتيىستى ورىندار بولۋى كەرەك. وسى جاعدايدى ەسكەرە وتىرىپ، مينيسترلىك مۇددەلى مەملەكەتتىك ورگاندارمەن بىرلەسىپ، جۋرناليستەردى قاجەت ورىندارمەن قامتۋ جۇمىسىن جۇرگىزەتىن بولادى. جالپى، ب ا ق وكىلدەرىن سوت پروتسەسىن جاريالاۋ كەزىندە ءبىرقاتار ەتيكالىق اسپەكتىلەردى، اتاپ ايتساق، زاڭ ۇستەمدىگىن، بەيتاراپ ادىلەتتىلىكتى ەسكەرىپ، جالعان اقپاراتتىڭ تارالۋىنان جانە كەز كەلگەن فورمادا سوت قىزمەتىنە ارالاسۋدان ساق بولۋعا شاقىرامىن»، - دەپ جازدى مينيستر ءوزىنىڭ Facebook پاراقشاسىندا.

وسىعان دەيىن قۋاندىق بيشىمبايەۆتىڭ ءىسى بويىنشا الدىن الا تىڭداۋ باستالعانىن جازدىق.

استانا قالالىق سوتى زالداردا قاجەتتى جابدىق ورناتىلىپ، وتىرىس تىكەلەي ەفيردە كورسەتىلگەنىن، سونداي-اق، ەلوردا سوتىنان اقپاراتتى جەدەل الۋعا مۇمكىندىكتىڭ جاسالعانىن ايتتى.