ايبەك ورالباي مانسابىنداعى ەڭ ماڭىزدى شەشىمى تۋرالى ايتتى

بوكسشىنىڭ ايتۋىنشا، سالماق دارەجەسىن وزگەرتۋ تۋرالى ۇسىنىستى العاش بولىپ جەكە باپكەرى اسقار ەركەبايەۆ ايتقان. الايدا سپورتشى بۇل شەشىمدى بىردەن قابىلداماعان.

ول ءبىراز ۋاقىت 90 كەلى سالماقتا ونەر كورسەتىپ، كەيىن 90 كەلىدەن جوعارى سالماق دارەجەسىندە دە كۇش سىناپ كورگەن. وسىلايشا جاڭا ساناتتىڭ وزىنە قانشالىقتى قولايلى ەكەنىن باعالاۋعا مۇمكىندىك العان.

- جەكە باپكەرىم اسقار ەركەبايەۆ باسقا سالماق دارەجەسىنە اۋىسقان دۇرىس بولاتىنىن ايتتى. ءبىز بۇل تۋرالى ۇزاق ويلاندىق. 90 كەلى سالماقتا تۋرنيرلەرگە قاتىسىپ جۇردىك، كەيىن 90 كەلىدەن جوعارى سالماقتى دا بايقاپ كوردىك. ءبىراز ۋاقىت قاجەت بولدى، ءبىراق قازىر بۇل وتە دۇرىس شەشىم بولعانىنا سەنىمدىمىن. سوڭعى شەشىمدى ءوزىم قابىلدادىم، - دەدى ايبەك ورالباي.

ونىڭ سوزىنشە، جاڭا سالماقتاعى العاشقى ماڭىزدى جارىستاردىڭ ءبىرى تايلاندتا وتكەن ازيا چەمپيوناتى بولعان. سول دودادا ول چەمپيون اتانعان.

كەيىن انگليانىڭ ليۆەرپۋل قالاسىندا وتكەن الەم چەمپيوناتىندا سۋپەراۋىر سالماقتا ءوزىن ەركىن سەزىنەتىنىن ءتۇسىنىپ، وسى ساناتتا ءبىرجولا قالۋعا شەشىم قابىلداعان.

ايبەك ورالباي سۋپەراۋىر سالماقتا ونەر كورسەتۋ ءۇشىن مىندەتتى تۇردە دەنە سالماعىن ارتتىرۋ قاجەت دەگەن پىكىرمەن كەلىسپەيدى.

بوكسشىنىڭ ايتۋىنشا، بۇل سالماقتا قارسىلاستاردىڭ دەنە ءبىتىمى مەن سالماعى ءارتۇرلى بولۋى مۇمكىن. ماسەلەن، ءوزى 100 كەلى تارتسا، قارسىلاسىنىڭ سالماعى 125 نەمەسە 135 كەلىگە جەتۋى ىقتيمال.

سوعان قاراماستان ول سالماعىن ادەيى كوبەيتپەۋدى ءجون كورگەن. ويتكەنى ارتىق سالماق قيمىل-قوزعالىستى باياۋلاتىپ، رينگتەگى جىلدامدىققا كەرى اسەر ەتۋى مۇمكىن.

- كەيبىر تۋرنيرلەر اراسىندا سالماعىم قاتتى ءوسىپ كەتكەن كەزدەر بولدى. جەڭىلىستەر دە كەزدەستى. سول ۋاقىتتان باستاپ سالماعىمدى قاتاڭ باقىلاۋعا الدىم. رينگكە قانداي فيزيكالىق دايىندىقپەن شىعۋ كەرەكتىگىن ناقتى ءتۇسىندىم. كوپشىلىك سۋپەراۋىر سالماقتاعىلار سالماعىن باقىلامايدى دەپ ويلايدى. شىن مانىندە، ءبىز تاماقتانۋ ءتارتىبىن دە، جاتتىعۋ پروتسەسىن دە مۇقيات قاداعالايمىز، - دەدى بوكسشى.

ايتا كەتەيىك، ايبەك ورالباي بۇعان دەيىن 92 كەلىگە دەيىنگى سالماقتا تابىستى ونەر كورسەتكەن. ول 2018-جىلى جاس وسپىرىمدەر وليمپياداسىنىڭ جەڭىمپازى، 2022-جىلى ازيا چەمپيونى اتاندى.

2024-جىلدىڭ مامىرىندا Elorda Cup تۋرنيرىندە سۋپەراۋىر سالماقتا العاش رەت باق سىناپ، پاريج وليمپياداسىنان كەيىن وسى ساناتتا ءبىرجولا قالدى.

2025-جىلدىڭ قىركۇيەگىندە ليۆەرپۋلدە وتكەن World Boxing الەم چەمپيوناتىندا التىن مەدال جەڭىپ الدى. ال 2026-جىلى ايتي-ناگويادا وتكەن ازيا ويىندارىنىڭ فينالىندا وزبەكستاندىق جاحونگير زوكيروۆتى تورەشىلەردىڭ ءبىراۋىزدان شىعارعان شەشىمىمەن 5:0 ەسەبىمەن جەڭدى.

ايتا كەتەيىك، بۇعان دەيىن ايبەك ورالبايدىڭ 2026-جىلعى ازيا ويىندارىندا 90 كەلىدەن جوعارى سالماق دارەجەسىندە فينالعا شىعىپ، وزبەكستاندىق جاحونگير زوكيروۆپەن كەزدەسەتىنى حابارلانعان بولاتىن.