ايازدا وتالماي قالعان كولىكتى قالاي ىسكە قوسۋ كەرەك؟

  ەلىمىزدىڭ بارلىق وڭىرىندە قىس قىسىپ، اياز كۇشىنە ءمىنىپ تۇر. ساقىلداعان اياز تەك ادامداردىڭ شيراق قيمىلداۋىنا عانا ەمەس، كولىكتەردىڭ دە وڭاي وتالۋىنا كوپ كەدەرگى.

قىس مەزگىلى جەتكەندە جەر-جەردەن اۆتوكولىكتەردىڭ ورتكە ورانعانىن كورىپ، ەستىپ جاتامىز. ماسەلەن، ارقانىڭ ايازى ارقاعا باتقان جەلتوقساننىڭ العاشقى ەكى اپتاسىندا استانادا 11 كولىك ورتەنىپ كەتكەن. قاقاعان قىستا كولىكتەردىڭ جانىپ كەتۋى ەڭ الدىمەن اۆتوماشينا قۇرىلعىلارىنىڭ مەزگىلگە ساي باپتالماعانىن بولادى.

تۇراقتا تۇرالاپ قالماۋ ءۇشىن كولىك يەسى قارا كۇزدەن باستاپ قامدانۋ قاجەت. كولىك ەكسپەرتتەرى قىستا كولىكتىڭ قىزباي، جولدا جۇيىتكىپ كەتپەۋىنىڭ باستى سەبەپتەرىنە اككۋمۋلياتوردىڭ وتىرىپ، موتور مايىنىڭ قاتىپ قالۋى سەبەپ دەيدى.

ەگەر كولىگىڭىز جىلى اۆتوتۇراقتا تۇرماسا اككۋمۋلياتوردى «ايالاپ» ۇستاۋ كەرەك.

قاتتى ايازدا اككۋمۋلياتوردىڭ قۋاتى ازايىپ كەتەدى. سول ءۇشىن ونى كيىزبەن نە سۋىقتان قورعايتىن ارنايى جاپقىشپەن وراعان دۇرىس نەمەسە جىلى ورىنعا اكەلىپ قويۋ كەرەك.

كولىك يەلەرى اياز ءبارىبىر دەگەنىن ىستەيدى دەپ، كولىگىن كەز كەلگەن جەرگە جايعاپ جاتادى. بۇل دا قاتە پىكىر. تاڭدا سۋىقپەن تالاسىپ سەرگەلدەڭگە تۇسپەس ءۇشىن، ماشيناڭىزدى جەل تيمەيتىن ىق جەرگە ورنالاستىرىڭىز.

ەگەر اۆتووتالدىرعىش (اۆتوزاۆودكا) ورناتىلعان بولسا، مىندەتتى تۇردە «تەمپەراتۋراعا ساي اۆتوماتتى وتالۋ» قىزمەتىن قوسىڭىز. سوندا موتور سۋىعان كەزدە كولىك وزدىگىنەن قوسىلىپ، قاتىپ قالۋدىڭ الدىن الادى. بۇل جاعدايدا كولىك يەسى اۆتوقۇرىلعىداعى ەلەكترلى سىمداردىڭ دۇرىس جالعانعانىنا 100 پايىز كوز جەتكىزۋ كەرەك.

كولىكتى قىستا قيىندىقسىز وتالدىرۋدىڭ مىنا تاسىلدەرىن ۇسىنامىز:

ءبىرىنشى كەزەكتە كولىكتى جىلىتۋ قاجەت. اككۋمۋلياتوردا ءبارى قالىپتى ەكەنىن بىلسەڭىز، ماسەلە مايدا بولۋى مۇمكىن. ءبىزدىڭ ەلدە ءجيى قولدانىستاعى قىسقى ماي - 40 گرادۋسقا ءتوزىمدى دەپ ساتىلعانمەن، پراكتيكادا بۇل ءدال كەلمەي جاتادى. سوندىقتان ماشينانى جىلى ورىنعا سۇيرەپ نەمەسە ورنىندا ىستىق جەل ۇرلەيتىن قۇرىلعىنى (تەپلوپۋشكا) قولدانىڭىز.

موتوردى ارنايى قىزدىرعىش قۇرال ارقىلى استىڭعى ماي تۇراتىن ءتۇبىنىڭ تۇسىنان قىزدىرۋ كەرەك نەمەسە ارنايى قوندىرعىمەن ىستىق جەل جىبەرگەن ءجون. ول كەزدە كولىكتىڭ الدىڭعى بولىگىن (كاپوت) اينالدىرا قىمتاپ، ىستىقتى سول ورىندا ۇستاپ قالۋعا تىرىسىڭىز. بۇل ءادىس بويىنشا كولىك 15-20 مينۋتتان كەيىن جىلىنادى. ارنايى قىزدىرعىشتى قولداناردا ىستىق جەلدى الدىڭعى اينا، تەرەزەلەرىنە باعىتتاۋدان ساق بولىڭىز. ايازدا قاتىپ تۇرعان تەرەزەلەر توسىن جىلى لەپتەن شىتىناپ كەتۋى ىقتيمال.

موتور مايىن ىسىتىپ قۇيۋ ارقىلى وتالدىرۋ كەرەك.

ايازدا مايى قاتىپ قالعان كولىكتى قوسىمشا كۇشسىز وتالدىرۋ ءۇشىن:

ءار كۇنى كەلەسى رەتتە كولىككە مىنبەيتىن بولساڭىز ماشينانىڭ اككۋمۋلياتورىن شەشىپ الىپ پەشتىڭ نە ۇيدەگى جىلۋ باتەرەياسىنىڭ قاسىنا قويۋ كەرەك؛

موتور مايىنا دا وسى ءادىستى قولدانىڭىز. موتور مايىنىڭ ماركاسى مەن ستاندارتتىق ءنومىرىنىڭ كولىگىڭىزگە قۇيىپ جۇرگەنمەن بىردەي بولعانى دۇرىس. مايدى اشىق، وت لاۋلاپ جاناتىن پەشتىڭ قاسىنا قويۋدان ساقتانىڭىز.

ءتۇنى بويى جىلىنعان اككۋمۋلياتوردى ورنىنا سالىپ، ىسىعان مايدى موتورعا قۇيۋ قاجەت. بۇل پروتسەسستەن كەيىن كولىكتى لەزدە وتالدىرۋعا اسىقپاڭىز. اككۋمۋلياتور مەن موتور مايى فيزيكالىق ارەكەتكە كوشۋگە دايىن بولاتىن 3-5 مينۋت ارالىعىندا كىلتتى بۇراعانىڭىز دۇرىس.

سونداي- اق جوعارىدا ايتىلعان كەڭەستەر كادەگە جاراماسا اۆتوسەرۆيستەرگە جۇگىنۋ دۇرىس شەشىم. بەلگىلى مەكەنجايعا جەتۋ ءۇشىن ارنايى ەۆاكۋاتوردىڭ كومەگىنە جۇگىنگەنىڭىز قاشاندا قاۋىپسىز.

جۇرگىزۋشىلەر كولىگى وتالماسا ءجيى جۇگىنەتىن كەلەسى ءتاسىل باسقا ماشينانىڭ اككۋمۋلياتورى ارقىلى قۇرىلعىنى قۋاتتاۋ. بۇل دا وڭاي ءتاسىل بولعانمەن ەكى قۇرىلعىنى جالعايتىن باسىندا قىسقىشى بار كابەلدىڭ ساپالى ەكەنىنە نازار اۋدارىڭىز.

«جول اماندىعى، ەر اماندىعى» دەگەن ءتامسىل بار. كولىگىڭىز قىسقا ساقاداي ساي بولماسا الىس جولعا جوسپارىڭىزدى جىلى كۇندەرگە شەگەرىڭىز. اككۋمۋلياتورعا باپپەن قاراپ، موتور مايىن الاردا ساپالىسىنان قارجى قاعىپ قالماڭىز!

دانا ءمىرزاقادىر

egemen.kz