مۇناي سەكتورىنداعى قيىندىقتار 2027-جىلى دا جالعاسۋى مۇمكىن – ح ۆ ق
استانا. KAZINFORM - قازاقستاننىڭ مۇناي سەكتورىنداعى ءوسىم قارقىنى 2027-جىلى تومەن دەڭگەيدە ساقتالادى. بۇل تۋرالى حالىقارالىق ۆاليۋتا قورىنىڭ (ح ۆ ق) قازاقستانداعى ميسسياسىنىڭ باسشىسى امينا لارەش استانادا وتكەن باسپا ءسوز ماجىلىسىندە ءمالىم ەتتى.
ونىڭ ايتۋىنشا، 2026-جىلى مۇناي سالاسىندا تۋىنداعان كەدەرگىلەردىڭ سالدارى كەلەسى جىلى دا سەزىلمەك.
- ءبىز بيىل مۇناي سەكتورىندا تۋىنداعان قيىندىقتاردى ەسكەردىك. ولاردىڭ سالدارى 2027-جىلى دا سەزىلەدى. سوندىقتان كەلەسى جىلى مۇناي سەكتورى ەكونوميكالىق ءوسىمنىڭ نەگىزگى قوزعاۋشى كۇشى بولا المايدى دەپ بولجاپ وتىرمىز، - دەدى امينا لارەش.
سپيكەر كاسپي قۇبىر كونسورتسيۋمىنا (ك ق ك) جاسالۋى مۇمكىن جاڭا شابۋىلداردىڭ ىقتيمال سالدارىنا دا توقتالدى. ونىڭ سوزىنشە، مۇناي تاسىمالىنا اسەر ەتەتىن قيىندىقتار ۇكىمەتتىڭ مۇنايدان الاتىن كىرىسىن ازايتىپ، بيۋجەت تاپشىلىعىنا اسەر ەتۋى مۇمكىن. دەگەنمەن ح ۆ ق مۇنداي تاۋەكەلدەردى نەگىزگى ەكونوميكالىق بولجامىنا ەنگىزبەگەن.
ح ۆ ق بولجامىنا سايكەس، 2027-جىلى قازاقستان ەكونوميكاسى نەگىزىنەن مۇنايدان تىس سالالاردىڭ ەسەبىنەن وسەدى.
- 2026-جىلى مۇناي سەكتورىندا بولعان ۇزىلىستەردىڭ سالدارى كەلەسى جىلى دا ساقتالادى. سەبەبى وسى جاعدايلارعا بايلانىستى مۇناي سالاسىنداعى كەيبىر جۇمىستار كەيىنگە قالدىرىلدى. سوندىقتان 2027-جىلى مۇناي سەكتورىنداعى ءوسىم وتە تومەن بولادى دەپ بولجاپ وتىرمىز، - دەدى امينا لارەش.
ەسكە سالايىق، بۇعان دەيىن ح ۆ ق قازاقستانداعى سالىق تۇسىمدەرىنە باعا بەرگەن ەدى.