مۇنداي نارسەمەن ازىلدەمەيدى: پروكۋرور ادىلەت زەينەلدىڭ رەاكسياسىن سىنعا الدى
استانا. KAZINFORM - ۇلدانا مىرزۋاننىڭ قازاسىنا قاتىستى سوتتا جابىرلەنۋشى ادىلەت زەينەل جۇبايىنىڭ اۋرۋحاناعا تۇسكەنى تۋرالى العاشقى حاباردى قالاي ەستىگەنىن ايتىپ بەردى. ول ارىپتەسىنىڭ قوڭىراۋىن باستاپقىدا نەلىكتەن ءازىل دەپ قابىلداعانىن دا ءتۇسىندىردى.
- ءسىز ارىپتەستەرىڭىز العاش رەت قوڭىراۋ شالىپ، جۇبايىڭىزعا ۇقسايتىن ادام اۋرۋحاناعا جەتكىزىلگەنىن حابارلاعان. سوندا ءسىز: «تەلەفوندى قويا سالدىم، ويتكەنى بۇل ءازىل شىعار دەپ ويلادىم» دەدىڭىز. ايتىڭىزشى، مۇنداي نارسەمەن ازىلدەۋگە بولا ما؟ ونىڭ ۇستىنە جۇبايىڭىزدىڭ شاقىرتۋعا بارا جاتقانىن جانە ءبىر جەردە ءبىر نارسەنىڭ قۇلاعانىن ايتقانىن ءبىلدىڭىز، - دەپ سۇراق قويدى پروكۋرور ساياجان سەرىكوۆا.
ءوز جاۋابىندا ادىلەت زەينەل نەنىڭ قۇلاعانىن ناقتى ايتپاعانىن ءتۇسىندىردى.
- ارينە، مۇنداي نارسەمەن ازىلدەمەيدى. ءبىراق كىمنىڭ قوڭىراۋ شالعانىن بىلمەدىم، ول مەنىڭ دوسىم نەمەسە تانىسىم ەمەس ەدى. سوندىقتان حاباردى بىردەن شىنايى قابىلدامادىم. ال شامامەن بەس مينۋتتان كەيىن، ناقتىراق ايتسام، ءۇش مينۋتتان سوڭ تۋعان انام قوڭىراۋ شالعاندا، سول كەزدە عانا ايەلىمنىڭ شىنىمەن قابىلداۋ بولىمىندە جاتقانىن ءتۇسىندىم، - دەپ جاۋاپ بەردى جابىرلەنۋشى.
پروكۋرور: جاقسى، وسى قوڭىراۋدان كەيىن جۇبايىڭىزعا ءوزىڭىز حابارلاسىپ كورۋگە تىرىستىڭىز با؟
ءا. زەينەل: مەن بىردەن تومەن ءتۇستىم. باسپالداقپەن ءتۇسىپ كەلە جاتقاندا قوڭىراۋ شالعان جوقپىن، ويتكەنى ۇيالى تەلەفونىمدى بولىمدە قالدىردىم. ۋاقىتىم بولمادى. سول كەزدە وتادان كەيىن قۇرالداردى جيناپ جاتقانمىن. ءبارىن تاستاپ، بىردەن تومەن ءتۇستىم.
پروكۋرور: ال اناڭىز سىزگە قاي كەزدە قوڭىراۋ شالدى؟
ءا. زەينەل: قۇرالداردى جيناپ جاتقان كەزدە.
پروكۋرور: ءبىراق تەلەفونىڭىزدى بولىمدە قالدىردىڭىز عوي.
ءا. زەينەل: ءبولىم دەگەنىم - قۇرالداردى جينايتىن بولمە. سول بولىمدە…
پروكۋرور: ياعني، تەلەفون وزىڭىزبەن بىرگە بولدى عوي؟
ءا. زەينەل: تەلەفون قۇرالداردى جينايتىن بولمەدە وزىممەن بىرگە بولدى. ءبىراق باسپالداقپەن تومەن تۇسە باستاعاندا، ونى سول جەردە قالدىردىم.
پروكۋرور: اناڭىز قوڭىراۋ شالعانشا جۇبايىڭىزعا ءوزىڭىز حابارلاسۋعا تىرىسپادىڭىز با؟
ءا. زەينەل: جوق. قابىلداۋ بولىمىنە تۇسكەننەن كەيىن قوڭىراۋ شالۋعا تىرىستىم. WhatsApp ارقىلى جازعان سياقتىمىن نەمەسە قوڭىراۋ شالعان شىعارمىن، ناقتى ەسىمدە جوق. ءبىراق جاۋاپ بولمادى، تەلەفوندى كوتەرمەدى. سودان كەيىن قابىلداۋ بولىمىندە جاقىن تۋىسى بولعانىم ءۇشىن العاشقى بەس مينۋتتا مەنى ىشكە كىرگىزبەدى. سوندا جەدەل جاردەمدە جۇمىس ىستەيتىن دوستارىما قوڭىراۋ شالا باستادىم. ۇلدانامەن ءبىر توپتا وقىعانبىز. سول جەردە جۇمىس ىستەيتىن دوستارىما قوڭىراۋ شالا باستادىم. ولار بولعان جاعدايدىڭ ءبارىن راستادى.
بۇعان دەيىن ادىلەت زەينەل ايەلىمەن وتكەن سوڭعى ساعاتتار تۋرالى ايتىپ بەرگەن ەدى.
