«اتىس توقتامايدى»: يزرايل بىتىمگە كەلۋ تۋرالى ۇسىنىستى قابىلدامادى

استانا. KAZINFORM - يزرايل سارسەنبى كۇنگى ا ق ش پەن ەۋروپالىق وداقتىڭ اۋقىمدى سوعىستىڭ الدىن الۋ ءۇشىن اتىستى ءۇش اپتاعا توقتاتىپ، «حەزبوللامەن» بىتىمگە كەلۋ تۋرالى ۇسىنىسىن قابىلدامادى، دەپ جازادى BBC.

يزرايل پرەمەر-ءمينيسترى بينيامين نەتانياحۋ يزرايل اسكەرىنە «تولىق كۇشپەن» سوعىسۋدى جالعاستىرۋدى بۇيىردى جانە كەشەگى اتىستى توقتاتۋ تۋرالى ۇندەۋدى جاۋاپسىز قالدىردى.

سارسەنبى كۇنى 11 ەل مەن ەۋروپالىق وداق بىرلەسكەن مالىمدەمە جاساپ، يزرايل مەن «حەزبوللانى» ءۇش اپتالىق ءبىتىم جاريالاۋعا جانە وسى ۋاقىت ىشىندە قاقتىعىستى بەيبىت جولمەن شەشۋگە شاقىردى.

وتىنىشكە ا ق ش، فرانسيا، ۇلى بريتانيا، گەرمانيا، يتاليا، جاپونيا، كانادا، اۋستراليا، ساۋد ارابياسى، بىرىككەن اراب امىرلىكتەرى، كاتار جانە ەۋروپا وداعى قول قويدى.

بۇل ۇسىنىسقا نەتانياحۋ كەڭسەسى: «اتىستى توقتاتۋ تۋرالى جاڭالىق شىندىققا جاناسپايدى. بۇل پرەمەر-مينيستر ءتىپتى جاۋاپ تا قايىرمايتىن امەريكالىق-فرانسۋزدىق ۇسىنىس»، - دەپ جاۋاپ بەردى.

«پرەمەر-مينيستر يزرايلگە قارسى كۇرەستى تولىق كۇشپەن جانە وعان ۇسىنىلعان جوسپارلارعا سايكەس جالعاستىرۋدى بۇيىردى. سونىمەن قاتار، گازاداعى شايقاس بارلىق سوعىس ماقساتتارىنا قول جەتكىزگەنشە جالعاسادى»، - دەدى نەتانياحۋ كەڭسەسى.

يزرايلدىڭ سىرتقى ىستەر ءمينيسترى يسراەل كاتتس كەيىنىرەك «سولتۇستىكتە اتىس توقتاتىلمايدى» دەپ ءتۇسىندىردى.

«ءبىز حەزبوللا تەرروريستىك ۇيىمىنا قارسى كۇرەستى جەڭىسكە جەتكەنشە جانە سولتۇستىك تۇرعىندارى ۇيلەرىنە قاۋىپسىز ورالعانعا دەيىن جالعاستىرامىز»، - دەدى كاتتس ح الەۋمەتتىك جەلىسىندە جاريالاعان مالىمدەمەسىندە.

ليۆاننىڭ دەنساۋلىق ساقتاۋ مينيسترلىگىنىڭ مالىمەتى بويىنشا، بەيسەنبىدە يزرايلدىڭ ليۆانداعى اۋە شابۋىلدارىنان 26 ادام قازا تاپتى، ولاردىڭ 19 ى ەلدىڭ سولتۇستىك-شىعىس ايماعىندا جۇرگەن سيريالىقتار.

بۇعان دەيىن يزرايل اسكەري كۇشتەرى ليۆاننان ەل اۋماعى ارقىلى 45 كە جۋىق زىمىران اتىلعانىن حابارلادى.

ايتا كەتەيىك، بۇعان دەيىن ا ق ش پەن ونىڭ وداقتاستارى يزرايل مەن «حەزبوللا» اراسىنداعى اتىستى 21 كۇنگە توقتاتۋعا شاقىرعان بولاتىن.