اتىراۋلىق تالاپكەرلەرگە 1200 گرانت ءبولىندى

اتىراۋ. KAZINFORM - ح. دوسمۇحامەدوۆ اتىنداعى اتىراۋ ۋنيۆەرسيتەتىندە قازاقستاندىق جوعارى وقۋ ورىندارىنىڭ اۋقىمدى كورمەسى ءوتىپ جاتىر. كورمەدەن قاجەتتى اقپارات الۋعا العاشقى كۇنى 2000 عا جۋىق تالاپكەر كەلدى.

ق ر عىلىم جانە جوعارى ءبىلىم مينيسترلىگى ۇيىمداستىرعان كورمەنىڭ ماقساتى - ق ر پرەزيدەنتى قاسىم-جومارت كەمەل ۇلى توقايەۆتىڭ تاپسىرماسى بويىنشا اتىراۋ وبلىسىنىڭ جاستارىنا بولىنگەن نىسانالى ءبىلىم گرانتتارى جايلى اقپارات بەرۋ.

«اتىراۋ وڭىرىنە 1200 ءبىلىم گرانتى بولىنگەن. بيىل ماماندىقتاردىڭ كولەمى كەڭەيىپ، ءبىلىم گرانتتارى 9 باعىتتى قامتىپ وتىر. اتىراۋ ءوڭىرىنىڭ تۇلەكتەرى ءۇشىن ماماندىق تاڭداۋدىڭ مۇمكىندىكتەرى كوبەيدى. بۇل كورمەدەن تالاپكەرلەر ماماندىقتى قالاي تاڭداۋ كەرەك ەكەنى جايلى دا بىلە الادى. ءاربىر جوعارعى وقۋ ورنى تۋرالى تولىققاندى مالىمەت بەرىلەدى»، - دەدى ءمينيستردىڭ كەڭەسشىسى رۋسلان ەمەلبايەۆ.

بيىل عىلىم جانە جوعارى ءبىلىم مينيسترلىگى باتىس، حالىق تىعىز قونىستانعان جانە جاڭادان قۇرىلعان وڭىرلەردىڭ تالاپكەرلەرى ءۇشىن 5000 گرانت ءبولىنىپ وتىر.

اتىراۋدا وتكەن كورمەدە «گرانت تۇرلەرى جانە تالاپكەردىڭ جول كارتاسى» تاقىرىبىنداعى كاسىبي باعدار بەرۋ سەمينارى دا ءوتتى.

وندا بىلىكتى ماماندار تالاپكەرلەرگە ماماندىقتى ءساتتى تاڭداۋدىڭ جولىن كورسەتىپ، نارىقتاعى سۇرانىسقا يە سالالار تۋرالى كەڭەس بەردى.

ۇيىمداستىرۋشىلار ۇلتتىق ءبىرىڭعاي تەستىلەۋدە 125 بالدان جوعارى ۇپاي جيناعان تۇلەكتەرگە سىيلىق تابىستادى.

مينيسترلىك 16-17-مامىر كۇندەرى وتەتىن كورمە اياسىندا «جوعارعى ءبىلىم كورمەسى» اتتى ارنايى فورۋمىن وتكىزۋدى جوسپارلاپ وتىر.

اۆتور
جانات قاپالبايەۆا