اتىراۋلىق جۇمىسشىلاردىڭ ەرەۋىلى: اكىم تۇسىنىكتەمە بەردى

  اتىراۋ وبلىسىنىڭ اكىمى سەرىك شاپكەنوۆ ماقات اۋدانىنداعى مۇناي وڭدەۋ زاۋىتى جۇمىسشىلارىنىڭ ەرەۋىلگە شىعۋىنا قاتىستى پىكىر ءبىلدىردى، دەپ حابارلايدى Kazinform.

«مۇناي وڭدەۋ زاۋىتىنىڭ جۇمىسشىلارى تۇسكە دەيىن شىقتى. ولار تالاپتار قويدى. ال تۇستەن كەيىن جۇمىستارىنا ورالدى. اتالعان مۇناي وندەۋ زاۋىتى قۇرىلىسى ەندى عانا باستاپ، ءبىرىنشى كەزەكتە جەرگىلىكتى اتىراۋلىق جۇمىسشىلاردى قابىلداي باستادى. جۇمىسشىلاردىڭ ءبىر تالابى - ماقات اۋدانىنىڭ تۇرعىندارىن عانا جۇمىسقا قابىلداۋ. ءبىراق بۇل مۇمكىن ەمەس، ءبىز بارلىعىنا ءبىرىڭعاي جاعداي جاساۋىمىز كەرەك. ولار جاعدايدى ءتۇسىندى»، - دەدى سەرىك شاپكەنوۆ ورتالىق كوممۋنيكاتسيالار قىزمەت الاڭىندا وتكەن باسپا ءسوز ءماسليحاتىندا.

سونداي- اق جۇمىسشىلار جالاقىنى 100 پايىزعا ارتتىرۋدى سۇراعان.

«ءبىر اپتا جۇمىس ىستەمەي جاتىپ جالاقىنى كوتەرۋدى تالاپ ەتىپ وتىر. ءبىز الدىمەن ولارعا جۇمىستا مامان رەتىندەگى قۇزىرەتتىلىگىن كورسەتۋى كەرەك ەكەنىن تۇسىندىردىك. بىردەن 100 پايىزعا كوتەرۋ دەگەن بولمايدى»، - دەيدى ول.