اتىراۋلىق 11 جاسار سپورتشى جۇزۋدەن قازاقستان رەكوردىن جاڭارتتى

 اتىراۋ. KAZINFORM - اتىراۋلىق 11 جاسار سپورتشى جانسەيىت جانبوسىن 50 مەترگە butterfly ستيلىندە جۇزۋدەن جاسوسپىرىمدەر اراسىندا قازاقستان چەمپيونى اتاندى.

ول بۇل قاشىقتىقتى 31,72 سەكۋندتا ەڭسەرىپ، التى جىل بۇرىنعى ەل رەكوردىن جاڭارتتى.

اتىراۋ وبلىسىنىڭ جۇزۋدەن قۇراما كومانداسىنىڭ باس باپكەرى يۆان گالكيننىڭ ايتۋىنشا، كوكشەتاۋدا «بۋراباي ءىنجۋ- مارجانى» رەسپۋبليكالىق تۋرنيرىنە 300 گە جۋىق سپورتشى قاتىسقان.

«تۋرنير قورىتىندىسىندا سپورتشىلاردىڭ دايىندىق دەڭگەيىنىڭ جوعارى ەكەنى بايقالدى. بۇل سايىسقا اتىراۋ وبلىسىنان 20 سپورتشى قاتىستى. ونىڭ ىشىندە جانسەيىت جانبوسىن butterfly ءستيلى بويىنشا 50 مەترگە جۇزۋدەن رەكوردتى جاڭارتتى. بۇل رەكورد سوڭعى 6 جىل بويى جاڭارماعان ەدى. ول بۇعان قوسا 50، 100، 200 مەتر قاشىقتىقتى كرول ادىسىمەن ءجۇزىپ، ءتۋرنيردىڭ «ۇزدىك سپورتشىسى» اتاندى»، - دەيدى يۆان گالكين.

ونىڭ دەرەگىنە سۇيەنسەك، جانسەيىت جانبوسىن اتىراۋ قالاسىنداعى №17 مەكتەپ- ليتسەيىنىڭ 5-سىنىبىندا وقيدى. جاس سپورتشى التى جىل بەرى جۇزۋمەن اينالىسىپ كەلەدى.

ال، تاعى ءبىر اتىراۋلىق ايانا ءسالي 100 مەترگە butterfly ستيلىمەن 1 مينۋت 29,94 سەكۋندتا ءجۇزىپ، جارىستىڭ جۇلدەگەرى اتانعان.

ەسكە سالا كەتەلىك، بۇدان بۇرىن پاراۆولەيبولدان ەل قۇراماسىنىڭ 9 ويىنشىسى حالىقارالىق دارەجەدەگى سپورت شەبەرى اتانعانىن جازعان بولاتىنبىز.

اۆتور

جولداسبەك شوپەعۇل