اتىراۋداعى گاز-حيميا كەشەنىندە پوليپروپيلەننىڭ جاڭا ءتۇرى شىعارىلا باستادى

  بىلتىر اتىراۋ وبلىسىندا جىلىنا 500 توننا پوليپروپيلەن شىعاراتىن گاز- حيميا كەشەنى ىسكە قوسىلعان ەدى. جاقىندا مۇندا پوليپروپيلەننىڭ جاڭا ءتۇرى شىعارىلدى، دەپ حابارلايدى Kazinform.

KPI كومپانياسى باسپا ءسوز قىزمەتىنىڭ مالىمەتىنشە، كەشەندە پوليپروپيلەننىڭ PP H350 FF/7 دەپ اتالاتىن جاڭا ءتۇرى (PP) ءساتتى وندىرلگەن. پوليمەر نارىعىندا بۇل ماركاعا سۇرانىس وتە جوعارى.

«PP H350 FF/7 سورتى -توقىما ەمەس ماتەريالداردى، ونىڭ ىشىندە سپينبوندى جانە تالشىقتاردى ءوندىرۋ ءۇشىن قاجەتتى شيكىزات. بۇل ماتەريالدى پايدالانۋ اۋىل شارۋاشىلىعى، مەديتسينا، قۇرىلىس، جەڭىل ونەركاسىپ، سۇزگى جانە جارناما ءوندىرىسى سەكىلدى سالالاردا كەڭىنەن تارالعان. ودان اۋىل شارۋاشىلىعىنا جابىن ماتالار، اگروتەكستيلدەر، جىلىجاي جابدىقتارىن شىعارۋعا بولادى. مەديتسيناعا قاجەتتى ءبىر رەتتىك كيىمدەردى، حيرۋرگيالىق جيىنتىقتاردى، مايلىقتار وندىرىلەدى. ال، قۇرىلىستا گيدرووقشاۋلاعىش مەمبرانالار، گەوتەكستيلدەر جانە گەوگريدتەردى شىعارۋ ءۇشىن قولدانىلادى»، - دەپ حابارلادى كومپانيانىڭ باسپا ءسوز قىزمەتى.

سونداي- اق، پوليپروپيلەننىڭ PP H350 FF/7 ماركالى ءتۇرىن جيھاز، ورتوپەديالىق ماتراتستار، قاپتامالار، اۆتوموبيل بەن شاڭسورعىشۇا ارنالعان سۇزگىلەر، رەسپيراتورلار، سومكەلەر، قاپتامالار شىعارۋعا شيكىزات رەتىندە پايدالانادى.

«بۇل - الەمدەگى پوليپروپيلەن ءوندىرىسىنىڭ 1 پايىزىن قۇرايتىن، ءارى قازاقستانداعى مۇناي- گاز ونەركاسىبىن وركەندەتۋگە سەپتىگى تيەتىن پوليپروپيلەن شىعاراتىن العاشقى كەشەن. مۇندا امەريكاندىق Lummus Technology Inc كومپانياسىنىڭ Catofin جانە Novolen تەحنولوگيالارى ورناتىلعان. وسىعان ۇقساس كەشەندەر الەمنىڭ ساۋد ارابياسى، ا ق ش، بەلگيا، وڭتۇستىك كورەيا جانە قىتاي ەسكىلدى بەس ەلىندە عانا بار»، - دەپ حابارلادى كومپانيانىڭ باسپا ءسوز قىزمەتىنەن.

ەسكە سالا كەتەلىك، بۇعان دەيىن اتىراۋداعى گاز-حيميا كەشەنى اقاۋلار جويىلعان سوڭ قايتا ىسكە قوسىلعان ەدى.