اتىراۋداعى اسكەري مەكتەپتە ەكى وتباسىنىڭ ەگىز ۇلدارى وقىپ ءجۇر

اتىراۋ. KAZINFORM - اتىراۋداعى «سارمات» مامانداندىرىلعان اسكەري مەكتەپ-ليتسەي- ينتەرناتىندا ەكى وتباسىنىڭ ەگىز ۇلدارى وقىپ ءجۇر.

اتىراۋ وبلىستىق ءبىلىم باسقارماسى باسپا ءسوز قىزمەتىنىڭ اقپاراتىنا سۇيەنسەك، بىلتىرعى قىركۇيەكتە اشىلعان «سارمات» مامانداندىرىلعان مەكتەپ-ليتسەي-ينتەرناتىندا 130 وقۋشى ءبىلىم الىپ ءجۇر.

«بۇل - ەلىمىزدىڭ باتىس ايماعىندا اشىلعان العاشقى اسكەري باعىتتاعى مەكتەپ. مۇندا تەك ۇلدار وقيدى. ءبىلىم ورداسىندا جاراتىلىستانۋ، ماتەماتيكا باعىتىنداعى پاندەر تەرەڭدەتىپ وقىتىلادى. ءقازىر اسكەري مەكتەپتە تەك اتىراۋ وبلىسىنىڭ عانا ەمەس، ماڭعىستاۋ، باتىس قازاقستان، شىعىس قازاقستان، جامبىل وبلىستارىنىڭ بالالارى وقىپ ءجۇر. وقۋشىلار جاتاحانامەن، ارنايى كيىممەن، تەگىن تاماقپەن قامتىلعان»، - دەپ حابارلادى باسقارمانىڭ باسپا ءسوز قىزمەتى.

Фото: Атырау облысының білім басқармасы

وقۋشىلاردىڭ اراسىندا ەكى وتباسىنىڭ ەگىز ۇلى بار. سونىڭ ءبىرى - ازامات پەن ازات بوريستەر. ولاردىڭ اكەسى تاجىك-اۋعان شەكاراسىنداعى ۇرىس قيمىلىنا قاتىسقان.

«ءبىز بولاشاعىمىزدى اسكەري سالامەن بايلانىستىرۋدى كوزدەدىك. سول ماقساتىمىزعا جەتۋ ءۇشىن «سارمات» مەكتەبىندە وقىپ ءجۇرمىز. مەن بولاشاقتا ەلىمىزدىڭ شەكاراسىن قورعايتىن ساردار بولعىم كەلەدى. سىڭارىم - ازات قۇتقارۋشى ماماندىعىن قالاپ ءجۇر»، - دەيدى ەگىزدىڭ سىڭارى ازامات بوريس.

ەكىنشى ەگىز - ناۋرىزبەك پەن امانگەلدى مەيرامبەك. ەكەۋى دە سپورتپەن اينالىسادى. ولار سپورتتىڭ دجيۋ-دجيتسۋ تۇرىنەن چەمپيون اتانعان.

«ءبىز كىشكەنتاي كەزىمىزدەن اسكەري قىزمەتكەر بولۋدى ارماندادىق. اتىراۋدا وسى مەكتەپ اشىلعاندا، قابىلداۋ ەمتيحانىنان سۇرىنبەي وتكەنىمىزگە قۋاندىق. مەن پوليتسەي بولسام دەيمىن. ال، امانگەلدى ءورت ءسوندىرۋشى بولعىسى كەلەدى»، - دەيدى ناۋرىزبەك امانگەلدى.

ەسكە سالا كەتەلىك، ماڭعىستاۋدا اسكەري بورىشىن وتەپ جۇرگەن اتىراۋلىق سارباز اۋىلىنا بوگەت سالۋعا كەلگەنىن جازعان بولاتىنبىز.