اتىراۋدا قىلمىستىق توپ كاسىپكەرلەردەن 10 ميلليون تەڭگە بوپسالاعان
اتىراۋدا كاسىپكەرلەردەن 2,6 ميلليون تەڭگە الۋ كەزىندە قىلمىستىق توپ ۇستالدى. كۇدىكتىلەردىڭ دەسترۋكتيۆتى ءدىني اعىم وكىلدەرى ەكەنى انىقتالدى، دەپ حابارلايدى Kazinform.
اتىراۋ وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، كۇدىكتىلەر 6-جەلتوقساندا ۇستالدى.
«ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى جەكە كاسىپكەرلەردەن 10 ميلليون تەڭگە بوپسالاعان قىلمىستىق توپتىڭ زاڭسىز ارەكەتىن اشكەرەلەدى. پوليتسەيلەر جابىرلەنۋشىلەردەن 2 ميلليون 600 مىڭ تەڭگە الۋ ءۇشىن كەزدەسۋ ۇيىمداستىرعان قىلمىستىق توپتىڭ 4 مۇشەسىن ۇستادى. دەسترۋكتيۆتى ءدىني اعىم وكىلدەرىنەن قۇرالعان توپ ناۋرىز ايىنان بەرى جابىرلەنۋشىلەردى بوپسالاپ، ءارقايسىسىنان 5 ميلليون تەڭگەگە جۋىق قارجى يەمدەنبەك بولعان»، - دەپ حابارلادى ۆەدومستۆودان.
قازىر كۇدىكتىلەردىڭ باسقا قىلمىستارعا قاتىسى بار-جوعى تەكسەرىلىپ جاتىر. ولارعا قاتىستى ق ر قىلمىستىق كودەكسىنىڭ 194-بابىنىڭ 3-بولىگى 2-تارماعىمەن سوتقا دەيىنگى تەرگەۋ امالدارى باستالدى. وزگە اقپارات ق ر قىلمىستىق-پروتسەستىك كودەكسىنىڭ 201-بابىنا سايكەس جاريالانبادى.
