اتىراۋدا قارجى پيراميداسىن قۇرعان ەكى ادام 6 جىلعا سوتتالدى
اتىراۋ قالاسىنىڭ ەكى تۇرعىنى «QazHomE» تۇتىنۋ كووپەراتيۆىنىڭ اتىمەن قارجى پيراميداسىن قۇرعان. سوت ۇكىمىمەن ەكەۋى دە 6 جىل مەرزىمگە باس بوستاندىعىنان ايىرىلدى، دەپ حابارلايدى Kazinform.
قارجىلىق مونيتورينگ اگەنتتىگىنىڭ رەسمي وكىلى الىبەك ءابدىلوۆتىڭ ايتۋىنشا، اتىراۋ وبلىستىق ەكونوميكالىق تەرگەپ-تەكسەرۋ دەپارتامەنتىنىڭ قىزمەتكەرلەرى قارجى پيراميداسىنىڭ زاڭسىز ارەكەتىن اشكەرەلەگەن.
«قارجى پيراميداسىن ۇيىمداستىرۋشىلار ازاماتتارعا جىلجىمايتىن مۇلىك بەرەمىز دەگەن جەلەۋمەن اقشا سالۋدى ۇسىنعان. سوتقا دەيىنگى تەرگەپ- تەكسەرۋ كەزىندە تۇتىنۋ كووپەراتيۆىنىڭ قىزمەتىنە 300 گە جۋىق سالىمشى تارتىلعانى انىقتالدى. ونىڭ ىشىندە تەك 35 ادام شاعىم ءتۇسىردى. بۇل شاعىم يەلەرىنە كەلتىرىلگەن شىعىن كولەمى 49 ميلليون تەڭگەدەن استى»، - دەپ حابارلادى الىبەك ءابدىلوۆ.
سوت ۇكىمىمەن «QazHome» تۇتىنۋ كووپەراتيۆىنىڭ باسشىلارى كىنالى دەپ تانىلدى. سوتتالۋشىلاردىڭ ءارقايسىسىنا 6 جىلعا باس بوستاندىعىنان ايىرۋ جازاسى تاعايىندالدى.
«قاراجاتتى ينۆەستيتسيالاۋ كەزىندە كومپانيانىڭ سەنىمدىلىگىن تەكسەرۋ قاجەت. وسى ماقساتتا «Baiqa, piramida!» تەلەگرام بوتى جۇمىس ىستەيدى. سونىمەن قاتار قارجىلىق مونيتورينگ اگەنتتىنىڭ سايتىندا قارجى پيراميدالارىنىڭ ءتىزىمى جاريالاندى»، - دەپ ءمالىم ەتتى الىبەك ءابدىلوۆ.
ەسكە سالا كەتەلىك، بۇعان دەيىن اتىراۋدا زاڭسىز ويىن بيزنەسىن ۇيىمداستىرعان ايەلدىڭ باس بوستاندىعى شەكتەلگەنىن حابارلاعان ەدىك.
