اتىراۋدا مەملەكەتتىك تۋدى قوقىسقا تاستاۋعا بايلانىستى تەرگەۋ باستالدى

 اتىراۋ وبلىسىندا مەملەكەتتىك تۋ قوقىس ۇيىندىسىنە تاستالعان. وسىعان بايلانىستى سوتقا دەيىنگى تەرگەۋ باستالدى، دەپ حابارلايدى قازاقپارات ءتىلشىسى. 

Мемлекеттік ту
Фото: Фото: ҚазАқпарат/ Виктор Федюнин

بۇل تۋرالى Facebook الەۋمەتتىك جەلىسىندەگى «زەللو اتىراۋ» پابليگىندە ۆيدەو تارادى.

ۆيدەو كەشە، 7-قازاندا تۇسىرىلگەن. شەتەلدىك كومپانيا بازاسىنىڭ اۋماعىندا قوقىس ءۇيىندىسى جينالعان. اعاش قالدىقتارىنىڭ اراسىندا مەملەكەتتىك تۋ جاتىر. تۋدى جۇمىسشىلار قوقىستىڭ اراسىنان جيناپ العان.

قوقىس الاڭىنىڭ جانىندا شەتەلدىك كومپانيانىڭ اتاۋى جازىلعان عيمارات تۇر. سوعان قاراعاندا بۇل وندىرىستىك بازا بولۋى مۇمكىن.

- مىناۋ - «سيچيم» كومپانياسىنىڭ بازاسى. انە، جوعارىدا «سيچيم» دەپ جازىلىپ تۇر، 8-بلوكتىڭ قاسى. مىنە، قوقىستىڭ اراسىندا تۋ جاتىر، - دەيدى جۇمىسشىنىڭ ءبىرى.

وسىعان بايلانىستى وبلىستىق پوليتسيا دەپارتامەنتىنىڭ باسپا ءسوز قىزمەتى سوتقا دەيىنگى تەرگەۋ باستالعانىن ءمالىم ەتتى. الايدا، تەرگەۋ قاي كومپانياعا قاتىستى ءجۇرىپ جاتقانىن ناقتىلاعان جوق.

«ق ر قىلمىستىق كودەكسىنىڭ 372-بابىنا (مەملەكەتتىك رامىزدەردى قورلاۋ) سايكەس سوتقا دەيىنگى تەرگەۋ امالدارى جۇرگىزىلىپ جاتىر. وزگە اقپارات ق ر قىلمىستىق- پروتسەستىك كودەكسىنىڭ 201-بابىنا (سوتقا دەيىنگى تەرگەپ-تەكسەرۋ دەرەكتەرىن جاريا ەتۋگە جول بەرمەۋ) سايكەس جاريالاۋعا جاتپايدى»، - دەپ ءمالىم ەتتى دەپارتامەنتتىڭ باسپا ءسوز قىزمەتىنەن.

ەلىمىزدە مەملەكەتتىك رامىزدەردى قورلاۋعا بايلانىستى قىلمىستىق كودەكستە قىلمىستىق جاۋاپكەرشىلىك قاراستىرىلعان. جوعارىدا اتالعان باپتا «قازاقستان رەسپۋبليكاسىنىڭ مەملەكەتتىك رامىزدەرىن قورلاۋ ءۇش مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا، نە سول مولشەردە تۇزەۋ جۇمىستارىنا، نە توعىز ءجۇز ساعاتقا دەيىنگى مەرزىمگە قوعامدىق جۇمىستارعا تارتۋعا، نە ەكى جىلعا دەيىنگى مەرزىمگە باس بوستاندىعىن شەكتەۋگە، نە سول مەرزىمگە باس بوستاندىعىنان ايىرۋعا جازالانادى»، - دەلىنگەن.

سوڭعى جاڭالىقتار