اتىراۋدا مەكتەپ ەسەپشىسى جالاقى قورىنان 32,6 ميلليون تەڭگەنى ءوز ەسەپشوتىنا اۋدارعان

اتىراۋ. KAZINFORM - اتىراۋداعى مەكتەپتەردە جالاقى قارجىسىن زاڭسىز اۋدارۋ دەرەگى انىقتالىپ وتىر. ءبىر ەسەپشى ءوزىنىڭ ەسەپشوتىنا 32,6 ميلليون تەڭگە اۋدارىپ العان.

اتىراۋ وبلىستىق ىشكى مەملەكەتتىك اۋديت دەپارتامەنتى باسشىسىنىڭ ورىنباسارى زويا ساپاروۆانىڭ دەرەگىنە سۇيەنسەك، وڭىردەگى 19 ءبىلىم بەرۋ مەكەمەلەرىنە مونيتورينگ جۇرگىزىلىپ، 98,3 ميلليون تەڭگەگە 42 دەن قويۋ شاراسى قولدانىلعان.

- دەپارتامەنت اۋديتورلارى جالاقى قورىنان ءىرى كولەمدەگى قارجىنى زاڭسىز اۋدارۋعا بايلانىستى بىرنەشە دەرەكتى انىقتادى. ماسەلەن، اتىراۋ قالاسىنداعى 36-مەكتەپ-گيمنازياسىنىڭ ەسەپشىسى ءوزىنىڭ ەسەپشوتىنا 32 ميلليون 666,5 مىڭ تەڭگەنى جانە جەكە تۇلعانىڭ ەسەپشوتىنا 15 ميلليون تەڭگەنى اۋدارىپ جىبەرگەن. ال ا. پۋشكين اتىنداعى 20-مەكتەپ-ليتسەيىنىڭ قىزمەتكەرىنە 3 ميلليون 912 مىڭ تەڭگە اۋدارىلعانى انىقتالدى، - دەيدى زويا ساپاروۆا.

ونىڭ مالىمەتىنشە، دەن قويۋ شارالارىنىڭ ناتيجەسىندە بيۋجەتكە 6 ميلليون 224,3 مىڭ تەڭگە قايتارىلعان.

- قارجى جىمقىرۋ دەرەكتەرىنىڭ الدىن الۋ، كەلەڭسىزدىكتەردى بولدىرماۋ ماقساتىندا بيۋجەتتىك، ونىڭ ىشىندە ءبىلىم بەرۋ سالاسىنداعى مەكەمەلەردەگى جالاقى تولەۋ جۇيەسىنە تۇراقتى مونيتورينگ جۇرگىزىلىپ كەلەدى. انىقتالعان جىمقىرۋ دەرەكتەرى تۋرالى بيۋجەتتىك باعدارلاما اكىمشىسىنە، سىبايلاس جەمقورلىققا قارسى ءىس قيمىل اگەنتتىگىنىڭ وبلىستىق دەپارتامەنتىنە، مەملەكەتتىك قىزمەت ىستەرى اگەنتتىگىنىڭ اۋماقتىق ورگانىنا ءبىر مەزگىلدە اقپارات بەرىلدى. ماقسات - بيۋجەت قارجىسىن قايتا قاراۋعا، ارتىق اۋدارىلعان بيۋجەت قارجىنى قايتارۋدى قامتاماسىز ەتۋ، - دەپ ءمالىم ەتتى زويا ساپاروۆا.

ەسكە سالا كەتەلىك، بۇعان دەيىن اتىراۋدا 2 بالاباقشا ەسەپشىلەرى بيۋجەت قارجىسىن جەكە ەسەپشوتقا اۋدارىپ جىبەرگەنىن جازعان بولاتىنبىز.