اتىراۋدا ەلەكترلى كولىك جۇرگىزۋشىلەرى 7 ايدا 930 مارتە جول ەرەجەسىن بۇزعان
اتىراۋ. KAZINFORM - اتىراۋ وبلىسىندا جىل باسىنان بەرى ەلەكترلى كولىك جۇرگىزۋشىلەرىنىڭ 930 مارتە جول ەرەجەسىن بۇزعانى تىركەلىپ وتىر.
اتىراۋ وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى، پوليتسيا پولكوۆنيگى ءابدىعاني سەيدۋاليەۆتىڭ ايتۋىنشا، موتوكولىكتەر مەن ەلەكتروساموكات جۇرگىزۋشىلەرى پوليتسەيلەردىڭ زاڭدى تالابىن ورىنداماي، قاشىپ كەتۋگە تىرىسادى.
«سوڭعى كەزدە موپەد، موتوسيكل مەن سكۋتەر جۇرگىزۋشىلەرى جاساعان جول-كولىك وقيعاسى جيىلەدى. بيىلعى جىل باسىنان بەرى ەلەكترلى كولىكتەردىڭ جۇرگىزۋشىلەرى تاراپىنان 930 قۇقىق بۇزۋشىلىق انىقتالدى. ولارعا اكىمشىلىك حاتتاما تولتىرىلىپ، 120 دان استام سكۋتەر، موپەد ارنايى تۇراققا قويىلدى. جۇرگىزۋشىلەردىڭ باسىم بولىگى جىلدامدىق اسىرىپ، باسىپ وزادى. باعدارشامنىڭ قىزىل تۇسىنە توقتاماي، قاۋىپسىزدىك تالاپتارىن ساقتامايدى. تاجىريبەگە سۇيەنسەك، مۇنداي كولىك تۇرلەرىن جاسوسپىرىمدەر جۇرگىزەدى. كامەلەتكە تولماعان جۇرگىزۋشىلەر جولدا ءجۇرۋ ەرەجەلەرىن بۇزادى»، - دەيدى ءابدىعاني سەيدۋالييەۆ.
ونىڭ پىكىرىنشە، جاسوسپىرىمدەردىڭ دەنى موتوسيكل، موپەد پەن سكۋتەردى قۇجاتسىز جۇرگىزەدى. اتا-انالارى بالالارىنىڭ قاۋىپسىزدىگىنە ءمان بەرمەيدى.
«تەك اتىراۋ قالاسىندا جىل باسىنان بەرى ەلەكترلى كولىك جۇرگىزۋشىلەرى بۇزعان 106 جول-كولىك وقيعاسى تىركەلدى. جول اپاتىنىڭ سالدارىنان 53 ادام دەنە جاراقاتىن الدى. ال، 5 ادام قايتىس بولدى»، - دەپ ءمالىم ەتتى ءابدىعاني سەيدۋاليەۆ.
بالاسىنا موپەد الىپ بەرگەن تۇرعىننىڭ ءبىرى - اتىراۋلىق تيمۋر راحيشەۆ. الايدا، ونىڭ ۇلى ءبىر جىل بۇرىن جول اپاتىنا ءتۇسىپ، دارىگەرلەرگە قارالىپ ءجۇر.
«اتا-انانىڭ ءبارى بالالارىن قۋانتقىسى كەلەدى. مەن دە ءبىر جىل بۇرىن 14 جاستاعى ۇلىمدى قۋانتۋ ءۇشىن موپەد الىپ بەرگەن ەدىم. ءبىراق، بالانىڭ ءبىر كۇنگى قۋانىشىن ەمەس، بولاشاعىن ويلاۋ قاجەتتىگىن كەش ءتۇسىنىپ وتىرمىن. قازىر كوشەدە موپەد ايداپ جۇرگەندەر جول ەرەجەسىن ءجيى بۇزادى. ءتىپتى ولاردىڭ جۇرىسىنەن قورقامىن. موپەدشىلەر ەكى كۇننىڭ بىرىندە جول اپاتىنا ۇشىراپ جاتىر. زارداپ شەگەتىندەر دە - موپەدشىلەر مەن سكۋتەرشىلەر. كوبىنىڭ جاسى 18-گە تولماعان. قازىر اربادا وتىرعان بالامدى كورگەندە، ءبىر كۇنگى قۋانىشى ءۇشىن بولاشاعىنا بالتا شاپتىم-اۋ دەپ وكىنەمىن»، - دەيدى تيمۋر راحيشەۆ.
ەسكە سالا كەتەلىك، بۇعان دەيىن اتىراۋدا موتوسيكلمەن تۇيەگە سوعىلعان جاس ءوسپىرىم وقيعا ورنىندا مەرت بولعانىن جازعان ەدىك.
اۆتور
جولداسبەك شوپەعۇل
