اتىراۋدا ءتۇن ورتاسىندا موپەد قاققان 28 جاستاعى ايەل اۋرۋحانادا كوز جۇمدى
اتىراۋ. KAZINFORM - اتىراۋ قالاسىندا موپەد جۇرگىزۋشىسى ءتۇن ورتاسىندا 28 جاستاعى ايەلدى قاعىپ كەتتى. جول-كولىك وقيعاسىنان زارداپ شەككەن ايەل وبلىستىق اۋرۋحانادا كوز جۇمدى.
بۇل دەرەكتى اتىراۋ وبلىستىق پوليتسيا دەپارتامەنتى باسپا ءسوز قىزمەتى راستادى. جول- كولىك وقيعاسى 11-قىركۇيەكتە تۇنگى ۋاقىتتا بولعان.
«اتىراۋ قالالىق پوليتسيا باسقارماسىنا 11-قىركۇيەك كۇنى ساعات 23:00-شاماسىندا موپەد جۇرگىزۋشىسىنىڭ جاياۋ جۇرگىنشىنى قاعىپ كەتكەنى تۋرالى حابار ءتۇستى. جول-كولىك وقيعاسى شاھارداعى ش. ءۋاليحانوۆ- گ. كانسيەۆ كوشەلەرىنىڭ قيىلىسىندا بولعانى انىقتالدى. موپەدتىڭ رۋلىندە 21 جاستاعى جۇرگىزۋشى بولعان. ايەل اتالعان كوشەلەردىڭ قيىلىسىندا جولدىڭ جاياۋ جۇرگىنشىگە ارنالماعان تۇسىنان ءوتىپ بارا جاتقان. سول كەزدە ونى موپەد قاققان»، - دەپ حابارلادى دەپارتامەنتتىڭ باسپا ءسوز قىزمەتى.
جول-كولىك وقيعاسىنان ءتۇرلى جاراقات العان ايەل جەدەل جاردەم بريگاداسىنىڭ كولىگىمەن اتىراۋ وبلىستىق اۋرۋحاناعا جەتكىزىلگەن. الايدا زارداپ شەككەن 28 جاستاعى ايەل العان جاراقاتىنىڭ سالدارىنان وبلىستىق اۋرۋحانادا قايتىس بولعان.
«قازىر جول-كولىك وقيعاسىنا بايلانىستى ءتيىستى ءىس قۇجاتتارى جيناقتالىپ جاتىر. وبلىس تۇرعىندارى مەن جۇرگىزۋشىلەرىنە جول ەرەجەسىن قاتاڭ ساقتاۋدى ەسكەرتەمىز»، - دەپ ءمالىم ەتتى دەپارتامەنتتىڭ باسپا ءسوز قىزمەتىنەن.
اۆتور
جولداسبەك شوپەعۇل
