اتىراۋدا ءۇش ادامنىڭ ولىمىنە سەبەپكەر بولعان تۇركيالىق 5 جىلعا سوتتالدى

اتىراۋ. KAZINFORM - اتىراۋ وبلىسىندا تۇركيانىڭ ازاماتى جول-كولىك وقيعاسىن جاساپ، ءۇش ادامنىڭ ولىمىنە سەبەپكەر بولعان. سوت وعان 7 جىلعا كولىك جۇرگىزۋ قۇقىعىنان، 5 جىلعا باس بوستاندىعىنان ايىرۋ جازاسىن تاعايىندادى.

تۇركيا رەسپۋبليكاسىنىڭ ازاماتى ماحامبەت اۋدانىندىق سوتىنىڭ ۇكىمىمەن سوتتالعان. الايدا، سوتتالۋشىنىڭ قورعاۋشىسى سوت ۇكىمىمەن كەلىسپەي، اپەللياتسيالىق شاعىم تۇسىرگەن.

اتىراۋ وبلىستىق سوتىنىڭ قىلمىستىق ىستەر جونىندەگى سوت القاسىندا تۇركيا رەسپۋبليكاسىنىڭ ازاماتى د.-عا قاتىستى ۇكىم اپەللياتسيالىق تارتىپتە قارالدى.

«ءبىرىنشى ساتىداعى سوت ۇكىمىمەن د. جول ءجۇرىسى جانە كولىك قۇرالىن پايدالانۋ قاعيدالارىن بۇزىپ، ابايسىزدا ءۇش ادامنىڭ ولىمىنە اكەپ سوققان ءىس-ارەكەتى ءۇشىن ق ر قىلمىستىق كودەكسىنىڭ 345-بابىنىڭ 4-بولىگىمەن كىنالى دەپ تانىلدى. وعان 7 جىل مەرزىمگە كولىك قۇرالىن باسقارۋ قۇقىعىنان، 5 جىل مەرزىمگە باس بوستاندىعىنان ايىرۋ جازاسى تاعايىندالعان. ءىس اپەللياتسيادا سوتتالعان د.-نىڭ قورعاۋشىسىنىڭ اپەللياتسيالىق شاعىمى بويىنشا قارالدى. قورعاۋشى سوتتالۋشىعا تاعايىندالعان جازانى جەڭىلدەتۋدى سۇرادى»، - دەپ حابارلادى وبلىستىق سوتتىڭ باسپا ءسوز قىزمەتى.

ءبىرىنشى ساتىداعى سوتتىڭ سوتتالۋشىعا جازا كىنانى مويىنداۋ تۋرالى پروتسەستىك كەلىسىم نەگىزىندە تاعايىندالعانىن، پروتسەستىك كەلىسىمنىڭ نەگىزدىلىگى تەكسەرىلدى. القا مۇشەلەرى تاعايىندالعان جازا مەرزىمىن تومەندەتۋگە نەمەسە جەڭىلدەتۋگە نەگىز جوق دەگەن قورىتىندى جاسادى.

«سوت القاسى سوتتالۋشىنىڭ جەكە باسىن زەردەلەپ، ونىڭ جاساعان قىلمىسىنىڭ سيپاتى مەن دارەجەسىن، قىلمىستىڭ زاردابى ءۇش ادامنىڭ ولىمىنە اكەپ سوققانىن ەسكەردى. ءبىرىنشى ساتىداعى سوتپەن وعان جەكە باسىنا، جاساعان ارەكەتىنە ساي زاڭ شەڭبەرىندەگى جازا تاعايىندالعان دەگەن تۇجىرىمعا كەلدى. سوت ۇكىمىن وزگەرتۋگە نەمەسە ونىڭ كۇشىن جويۋعا نەگىزدەر انىقتالمادى. قىلمىستىق ىستەر جونىندەگى سوت القاسىنىڭ قاۋلىسىمەن ءبىرىنشى ساتىداعى سوتتىڭ ۇكىمى وزگەرىسسىز، اپەللياتسيالىق شاعىم قاناعاتتاندىرۋسىز قالدىرىلدى»، - دەپ ءمالىم ەتتى سوتتىڭ باسپا ءسوز قىزمەتى.

سوت ۇكىمى زاڭدى كۇشىنە ەندى.

 

اۆتور
جولداسبەك شوپەعۇل