اتىراۋدا بۇرىن ءىستى بولعان ادامدار مەكتەپتە جۇمىس ىستەگەن

прокуратура
Фото: gov.kz

اتىراۋ. KAZINFORM - اتىراۋ وبلىسىندا بۇرىن سوتتى بولعان ءۇش ادامنىڭ مەكتەپتە جۇمىس ىستەگەنى انىقتالدى. بۇل تۋرالى وبلىستىق پروكۋراتۋرانىڭ باسپا ءسوز قىزمەتى حابارلادى.

ءمالىم بولعانداي، بۇل ازاماتتار مەكتەپتەرگە كامەلەتكە تولماعانداردىڭ جىنىستىق تيىسپەۋشىلىگىنە قاتىستى جانە دەنساۋلىعىنا قاساقانا اۋىر زيان كەلتىرگەنى ءۇشىن قىلمىستىق جاۋاپكەرشىلىككە تارتىلعانى انىقتالعان.

«جوعارى سىنىپ وقۋشىلارىنىڭ ۇرىپ-سوعۋ فاكتىلەرىن جانە باسقا دا قۇقىققا قارسى ءىس-قيمىلداردى جاسىرعانى ءۇشىن ا ق ب ت ك- ءنىڭ 127-1-بابى بويىنشا 5 مەكتەپ ديرەكتورى اكىمشىلىك جاۋاپتىلىققا تارتىلدى»، - دەلىنگەن حابارلامادا.

ودان وزگە وبلىستىق پروكۋراتۋرا 16 مەملەكەتتىك جانە 1 جەكەمەنشىك مەكتەپتە تىيىم سالىنعان ينتەرنەت-كونتەنتكە ەركىن قول جەتكىزۋ فاكتىلەرى انىقتاعان. قازىرگى ۋاقىتتا وسى سايتتارعا قولجەتىمدىلىك شەكتەلىپ، كىنالى ادامدار ا ق ب ت ك 409-بابىنىڭ 7-2-بولىگى بويىنشا اكىمشىلىك جاۋاپتىلىققا تارتىلدى.

«بارلىعى 129 مەملەكەتتىك جانە 11 جەكەمەنشىك مەكتەپ تەكسەرۋمەن قامتىلىپ، زاڭ بۇزۋشىلىقتاردى جويۋ تۋرالى 91 ۇسىنىس بەرىلدى. 108 زاڭدى جانە 55 لاۋازىمدى تۇلعا اكىمشىلىك جاۋاپتىلىققا تارتىلدى، ءبىر ادام جالعان ديپلومدى پايدالانعانى ءۇشىن قىلمىستىق جاۋاپكەرشىلىككە تارتىلدى. وسىعان ۇقساس فاكتىلەر بويىنشا تاعى ەكى سوتقا دەيىنگى تەرگەپ-تەكسەرۋ باستالدى. 353 ميلليون تەڭگە سوماسىنا نەگىزسىز جوسپارلانعان مەملەكەتتىك ساتىپ الۋ توقتاتىلدى»، - دەلىنگەن پروكۋراتۋرانىڭ حابارلاماسىندا.

وسى باعىتتاعى تەكسەرۋلەر جالعاساتىن بولادى.

سوڭعى جاڭالىقتار