13:07, 23 - مامىر 2024 | GMT +6
اتىراۋدا بالاباقشا اۋلاسىندا ءيتتى قورلاعان ەر ادامعا قىلمىستىق ءىس قوزعالدى
اتىراۋ. KAZINFORM - اتىراۋدا بالاباقشا اۋلاسىندا ءيتتى قورلاعان ەر ادام ۇستالدى. كۇدىكتىگە قاتىستى قىلمىستىق ءىس قوزعالدى.
بۇل تۋرالى الەۋمەتتىك جەلىدە ۆيدەو تارادى. وقيعا اتىراۋ قالاسىندا بولعان.
اتالعان دەرەكتى راستاعان پوليتسيا دەپارتامەنتىنىڭ باسپا ءسوز قىزمەتىنىڭ اقپاراتىنا سۇيەنسەك، 30 جاستاعى كۇدىكتى ۇستالعان.
«پوليتسيا قىزمەتكەرلەرى «جۇلدىز» شاعىن اۋدانىنىڭ اۋماعىندا ورنالاسقان بالاباقشا اۋلاسىندا بۇرالقى ءيتتى قورلاعان ەر ادام ۇستالدى. كۇدىكتى ءيتتى تەۋىپ، جارعا لاقتىرعان. قازىر كۇدىكتىگە قاتىستى جانۋارلارعا قاتىگەزدىكپەن قاراۋ دەرەگىمەن قىلمىستىق ءىس قوزعالدى. وزگە اقپارات تەرگەۋ مۇددەسىنە سايكەس جاريالاۋعا جاتپايدى»، - دەپ ءمالىم ەتتى دەپارتامەنتتىڭ باسپا ءسوز قىزمەتىنەن.
