اتىراۋدا باعانى نەگىزسىز وسىرگەن كاسىپكەرلەرگە 2,8 ميلليون تەڭگە ايىپپۇل سالىنعان
اتىراۋ. KAZINFORM - اتىراۋ وبلىسىندا كۇندەلىكتى تۇتىناتىن ازىق- تۇلىك باعاسىن نەگىزسىز وسىرگەن كاسىپكەرلەرگە 2 ميلليون 817 مىڭ تەڭگە ايىپپۇل سالىنعان.

اتىراۋ وبلىسى اكىمىنىڭ ورىنباسارى مارات مۋرزييەۆتىڭ ايتۋىنشا، ەڭ وتكىر ماسەلەنىڭ ءبىرى - كۇندەلىكتى تۇتىناتىن ازىق- تۇلىكتىڭ باعاسى.
- بىلتىر اتىراۋ وبلىستىق ساۋدا جانە تۇتىنۋشىلار قۇقىعىن قورعاۋ دەپارتامەنتى ق ر ساۋدا قىزمەتىن رەتتەۋ تۋرالى زاڭ تالاپتارىن بۇزعان 62 كاسىپكەرلىك سۋبەكتىگە جوسپاردان تىس تەكسەرۋ جۇرگىزدى. تەكسەرۋ قورىتىندىسىمەن 46 كاسىپكەرلىك نىسانىا 16 ەسكەرتۋ بەرىلىپ، 30 اكىمشىلىك ايىپپۇل سالىندى. ايىپپۇلدىڭ جالپى سوماسى 2 ميلليون 817 مىڭ 691 تەڭگەنى قۇرادى، - دەيدى مارات مۋرزيەۆ.
ونىڭ ايتۋىنا قاراعاندا، بىلتىرعى مامىردا الەۋمەتتىك ماڭىزى بار ازىق- تۇلىك تاۋارلارىنا رۇقسات ەتىلگەن شەكتى بولشەك ساۋدا باعالارىنىڭ مولشەرى بەكىتىلگەن. وسىعان وراي مونيتورينگتىك توپ اپتا سايىن ەڭ قاجەتتى ازىق - تۇلىكتەردىڭ باعاسىن قاداعالايدى.
- وڭىردەگى ساۋدا نىساندارىنىڭ يەلەرىنە باعانى تۇراقتاندىرۋ جونىندە كەڭەس بەرىلدى. سوعان قاراماستان، تۇتىنۋشىلار ارىزىنا سايكەس اتىراۋ قالاسىنداعى «انۆار»، «ماركو»، «يارماركا»، «ماشا فرۋت»، قۇلسارى قالاسىنداعى «يدەال» سۋپەرماركەتىنە شارا قولدانىلدى. ويتكەنى بۇل ساۋدا ورىندارىندا توتەنشە جاعداي كەزىندە بەلگىلەنگەن تاۋارلار شەكتى باعادان قىمباتقا ساتىلعان. ەندى بيىل الەۋمەتتىك ماڭىزى بار تاۋارلاردىڭ باعاسىن نەگىزسىز وسىرگەن كاسىپكەرلەرگە ايىپپۇل كولەمى ءبىرىنشى زاڭ بۇزۋشىلىقتان كەيىن ەسكەرتۋسىز سالىناتىن بولادى، - دەپ حابارلادى مارات مۋرزييەۆ.
قازىر الەۋمەتتىك ماڭىزى بار ازىق- تۇلىكتەر «دينا»، «كوكتەم»، «سارايشىق» بازارى مەن «ليدەر»، «iDEAL» «Paida market» سۋپەرماركەتىندە، سونداي- اق 6 ساۋدا پوۆيلونىندا ساتىلادى.
ەسكە سالا كەتەلىك، بۇدان بۇرىن اتىراۋ وبلىسىنىڭ تۇراقتاندىرۋ قورىنان 1,4 مىڭ توننا كارتوپ ساتىلعانىن حابارلاعان بولاتىنبىز.