اتىراۋدا 74 جاستاعى تاكسيست اجە جول ەرەجەسىن ەش بۇزباعان

استانا. KAZINFORM - اتىراۋ وبلىسىنداعى ماقات-دوسسور تاسجولىندا جول ەرەجەسىن مۇلدە بۇزباعان تاجىريبەلى جۇرگىزۋشى بار. بۇل تۋرالى Polisia.kz جازدى.

ول - 74 جاستاعى زەينەتكەر ساۋلە مۇسايەۆا. 30 جىلدان استام ۋاقىت بويى كولىك تىزگىندەپ، ونىڭ 22 جىلىن تاكسي قىزمەتىنە ارناعان. ول جىلدامدىقتى اسىرماۋ، جاياۋ جۇرگىنشىلەرگە جول بەرۋ، كولىك ايداپ كەلە جاتىپ تەلەفونعا الاڭداماۋ سياقتى قاعيدالاردى قاتاڭ ۇستانىپ، كولىگىمەن مىڭداعان شاقىرىمدى ءجۇرىپ وتكەن.

- كولىك جۇرگىزۋ - تەك ءرولدى ۇستاپ، گاز باسۋ ەمەس. بۇل - ۇلكەن جاۋاپكەرشىلىك. كەيبىر جۇرگىزۋشىلەر اسىعىستىق تانىتىپ، ەرەجەنى ەلەمەيدى. ءبىراق جولدا ءار سەكۋند ماڭىزدى. ءبىر قاتەلىك ورنى تولماس قايعىعا اكەلۋى مۇمكىن. سوندىقتان مەن ءاردايىم ءتارتىپتى ساقتايمىن جانە وزگەلەرگە دە وسىنى كەڭەس ەتەمىن، - دەيدى ول.

ساۋلە مۇسايەۆا الماتى تەحنيكالىق ينستيتۋتىن ءبىتىرىپ، ينجەنەر-تەحنولوگ ماماندىعىن العان. ول ەڭبەك جولىندا ينجەنەر، ەكونوميست، فابريكا ديرەكتورى قىزمەتتەرىن اتقارىپ، زەينەتكە شىققان. ال كولىك جۇرگىزۋگە دەگەن قىزىعۋشىلىعى بالا كەزىنەن باستالعان.

العاشقى كولىگىن - 1998 -جىلى ساتىپ الىپ، سودان بەرى بىرنەشە كولىك اۋىستىرعانىن ايتادى. زەينەتكە شىققاننان كەيىن ساۋلە مۇسايەۆا ماقات اۋدانىنداعى كولىك جۇرگىزۋ مەكتەبىندە ساباق بەرگەن.

- جولداعى قاۋىپسىزدىك - ءاربىر جۇرگىزۋشىنىڭ جاۋاپكەرشىلىگى. ءبىز جول ەرەجەسىن ساقتاۋ ارقىلى ءوزىمىزدى عانا ەمەس، وزگەلەردى دە قورعايمىز. پوليتسيا قىزمەتكەرلەرى ءاردايىم تارتىپكە شاقىرادى، ويتكەنى ءبىر ساتتىك بەيقامدىق ورنى تولماس وكىنىشكە اكەلۋى مۇمكىن. جولدا اباي بولۋ - ءوزىڭدى جانە جاقىندارىڭدى قورعاۋ قاعيداسى ءار جۇرگىزۋشىنىڭ ساناسىندا بولۋى كەرەك، - دەيدى ساۋلە مۇسايەۆا.

ماقات اۋداندىق پوليتسيا ءبولىمى دە تاكسيست اجەيدى جاقسى تانيدى ەكەن.

- ساۋلە مۇسايەۆا - اۋدانىمىزدىڭ ۇلگىلى جۇرگىزۋشىلەرىنىڭ ءبىرى. ونى جەرگىلىكتى تۇرعىندار جاقسى تانيدى، ۇقىپتىلىعى مەن سابىرلى مىنەزىن جوعارى باعالايدى. ول بىردە- ءبىر رەت جول ەرەجەسىن بۇزعان ەمەس. مۇنداي تاجىريبەلى جۇرگىزۋشىلەر جاس بۋىنعا ۇلگى بولۋى ءتيىس. ءبىز كوكتەم مەرەكەسى قارساڭىندا ساۋلە اپامىزدى قۇتتىقتاپ، وعان العىسىمىزدى ءبىلدىرۋدى ءجون كوردىك، - دەيدى ماقات اۋداندىق پوليتسيا ءبولىمى جەرگىلىكتى پوليتسيا قىزمەتى باسقارماسىنىڭ ۋچاسكەلىك پوليتسيا ينسپەكتورى سايفوللا كاپانوۆ.

پوليتسەيلەر 74 جاستاعى تاكسي جۇرگىزۋشىسىنە گۇل شوقتارى مەن ەستەلىك سىيلىق تابىستاپ، جولدا جۇرەتىن بارلىق ازاماتتاردى ساقتىققا شاقىردى. بۇگىنگى كەيىپكەرىمىز ساۋلە مۇسايەۆا - جولداعى ءتارتىپ پەن جاۋاپكەرشىلىكتى بەرىك ۇستانعان جان. ونىڭ تاجىريبەسى - بارلىق جۇرگىزۋشىگە ۇلگى.

ەسكە سالا كەتەيىك، بۇعان دەيىن اقتاۋلىق تاكسيست جولاۋشىلارىنا ءان ايتىپ بەرەتىنىن جازعان بولاتىنبىز.

اۆتور

باقىتگۇل اباي قىزى