اتىراۋعا تاسقىن سۋدىڭ كوپ بولىگى مامىر ايىنىڭ باسىندا كەلۋى مۇمكىن

Көлік министрлігі Жайық-Каспий каналын тереңдетуді ұсынды
Фото: ortcom.kz

اتىراۋ. KAZINFORM - اتىراۋلىق عالىمدار وڭىرگە تاسقىن سۋدىڭ كوپ بولىگى مامىر ايىنىڭ باسىندا كەلۋى مۇمكىن ەكەنىنە بولجام جاساپ وتىر.

اتىراۋ وبلىستىق جەدەل شتاب جانىنداعى زەرتتەۋشى عالىمداردىڭ جۇمىسشى توبى بار. اتالعان توپتىڭ مۇشەسى ارمان جۇماعازيەۆتىڭ ايتۋىنشا، جايىقپەن كەلەتىن مول سۋ مامىر ايىنىڭ باسىندا وزەننىڭ ارناسىنا شىعىپ، تاسۋى مۇمكىن.

«سۋ تاسقىنىنا بايلانىستى كوپ جىلعى دەرەكتەردى ساراپتاۋ، ەسكەرۋ كەرەك. وسى تۇرعىدان بۇرىنعى دەرەكتەرگە سارالاساق، اتىراۋ وبلىسىنىڭ اۋماعىنا تاسقىن سۋدىڭ كوپ بولىگى ادەتتە مامىر ايىنىڭ ورتاسىندا كەلگەنىن بىلەمىز. ءبىراق، بيىلعى جىلى رەسەي فەدەراتسياسىنىڭ ايماعىنان مول سۋ كەلىپ، كوكتەمگى تاسقىننىڭ ەرتە باستالۋىنا سەبەپ بولىپ وتىر. باتىس قازاقستان وبلىسىنىڭ اۋماعىمەن تومەنگە قاراي اققان سۋ اتىراۋعا شامامەن 6-7 كۇندە كەلەدى. وسىنداي بولجامعا سۇيەنسەك، 2-3 مامىر كۇندەرى جايىق وزەنىنىڭ اتىراۋ وبلىسىنداعى ارناسى تولۋى مۇمكىن»، - دەيدى عالىم ارمان جۇماعازيەۆ.

وبلىستىق جەدەل شتابتىڭ مالىمەتىنشە، بۇگىن، 24-ساۋىردەگى تاڭەرتەڭگى ساعات 08:00 دە اتىراۋ قالاسى گيدروبەكەتتە جايىق وزەنىنىڭ دەڭگەيى 422 سانتيمەترگە جەتكەن.

«بۇل وڭىردە جايىق وزەنىنىڭ قاۋىپتى دەڭگەيى - 550 سانتيمەتر. سۋ تاسقىنىنىڭ قاۋپىنە بايلانىستى 24-ءساۋىر كۇنگى مالىمەت بويىنشا اتىراۋ قالاسىنداعى جايىق جاعالاۋىنا 229,6 شاقىرىم بوگەت تۇرعىزىلدى»، - دەپ ءمالىم ەتتى وبلىستىق جەدەل شتابتان.

ەسكە سالا كەتەلىك، بۇدان بۇرىن اتىراۋ وبلىسىندا جاعالاۋعا 2,7 ميلليون قۇم تولتىرىلعان قاپ توسەلگەنىن جازعان ەدىك.

كەيىن اتىراۋدىڭ ماحامبەت اۋدانىندا جايىق وزەنىنىڭ جايىلماسىنا سۋ شىققانىن حابارلاعان بولاتىنبىز.

سونداي-اق، ماحامبەت اۋدانىندا جايىق ماڭىنداعى جىرالار اشىلىپ جاتىر.

سوڭعى جاڭالىقتار