تۇرعىندار پىكىرىنەن كەيىن اتىراۋدا قالا كۇنى تويلانبايتىن بولدى
اتىراۋ. KAZINFORM - اتىراۋدا قالا كۇنىنە جوسپارلانعان بارلىق مەرەكەلىك ءىس-شارا وتكىزىلمەيدى. بۇل تۋرالى اتىراۋ قالاسىنىڭ اكىمدىگى حابارلادى.
ماڭعىستاۋ وبلىسىندا بولعان قايعىلى جاعدايدان كەيىن اتىراۋ قالاسىنىڭ كەي تۇرعىندارى الەۋمەتتىك جەلى ارقىلى مۇنايلى شاھاردىڭ تۋعان كۇنىنە جوسپارلانعان ءىس-شارالاردى وتكىزبەۋ تۋرالى ۇسىنىس بىلدىرگەن ەدى.
جالپى قالا كۇنىنە وراي وبلىس ورتالىعىندا ءتۇرلى باعىتتاعى 35 كە جۋىق ءىس-شارا وتكىزۋ جوسپارلانعان. ولاردىڭ اراسىندا سان الۋان فورماتتاعى كونسەرت، بايقاۋ، تۋرنير مەن كونسەرت بار. قالا بيلىگى العاشىندا دايىندىقتىڭ بىرنەشە اي بۇرىن باستالعانىن ايتىپ، ءىس-شارالاردى وتكىزبەۋ تۋرالى ماسەلە قارالىپ جاتقانىن مالىمدەگەن ەدى. بۇگىندە اكىمدىك ءبىر شەشىمگە كەلگەن.
- اقتاۋ قالاسىندا بولعان قايعىلى جاعدايعا بايلانىستى اتىراۋ جۇرتىنىڭ دا قابىرعاسى قايىستى. اتىراۋ قالاسىنىڭ كۇنىنە ارنالعان بارلىق مەرەكەلىك ءىس-شارا وتكىزىلمەيتىنىن حابارلايمىز. قالا تۇرعىندارى مەن قوناقتارىنان قابىلدانعان شەشىمگە تۇسىنىستىكپەن قاراۋدى سۇرايمىز، - دەپ حابارلادى اتىراۋ قالاسىنىڭ اكىمدىگى.
