اتىراۋدا ليفت قۇلاپ، ءۇش ادام اۋرۋحاناعا جەتكىزىلدى

اتىراۋ قالالىق اكىمدىگى تاراتقان اقپاراتقا سۇيەنسەك، بۇل جاعداي 5-قازاندا قۇلمانوۆ كوشەسى، 1ب مەكەنجايىنداعى «گراند اتىراۋ» تۇرعىن ءۇي كەشەنىنىڭ «ب» بلوگىندا بولعان.

اۆاريالىق جاعداي كەزىندە ليفتتە ءتورت تۇرعىن بولعان. ءۇش ادام جەدەل جاردەم بريگاداسىمەن مەديتسينالىق تەكسەرۋدەن ءوتۋ ءۇشىن اۋرۋحاناعا جەتكىزىلدى. الدىن الا مالىمەت بويىنشا، ولاردىڭ جاعدايى قاناعاتتانارلىق. تاعى ءبىر تۇرعىن مەديتسينالىق كومەكتەن باس تارتقان.

- وقيعادان كەيىن اتىراۋ قالاسىنىڭ اكىمى دانيار تاحانوۆ تۇرعىن ءۇي كەشەنىنە بارىپ، جاعدايمەن تانىستى. قالا اكىمى تۇرعىندارمەن جانە جاۋاپتى قىزمەت وكىلدەرىمەن سويلەسىپ، وقيعانىڭ ءمان-جايىن تىكەلەي باقىلاۋىنا الدى. جاۋاپتى قىزمەتتەرگە ليفتىنىڭ اۆاريالىق تومەن تۇسۋىنە نە سەبەپ بولعانىن شۇعىل انىقتاۋ تاپسىرىلدى. سونىمەن قاتار قالاداعى بارلىق ليفتىلەردىڭ تەحنيكالىق جاعدايىن تولىق تەكسەرىپ، قاۋىپسىزدىك دەڭگەيىن باعالاۋ جونىندە تاپسىرما بەرىلدى، - دەپ حابارلادى اكىمدىكتىڭ باسپا ءسوز قىزمەتى.

قازىر وقيعانىڭ ناقتى سەبەپتەرى انىقتالىپ جاتىر.

جالپى وبلىس ورتالىعىندا 179 كوپقاباتتى تۇرعىن ۇيدە بارلىعى 570 كە جۋىق جەدەلساتى بار. ونىڭ 67 ءسىن جوندەۋ جوسپارلانىپ وتىر. بىلتىر بۇل جۇمىستى ىستەۋگە قازىنادان قارجى بولىنبەي قالعان ەدى.

اتىراۋ قالالىق تۇكش جانە تۇرعىن ءۇي ينسپەكسياسىنىڭ مالىمەتىنشە، 2012 جانە 2024-جىلدارى قالا اۋماعى بويىنشا 30 تۇرعىن ۇيدەگى 59 ليفتى اۋىستىرىلدى.