اتىراۋ ۆوكزالىنداعى جازاتايىم وقيعا: قوسالقى مەردىگەرگە 1,3 ميلليون تەڭگە ايىپپۇل سالىندى

اتىراۋ. KAZINFORM - اتىراۋ ۆوكزالىن جاڭعىرتۋ كەزىندە 4,5 مەتر بيىكتىكتەن قۇلاعان جۇمىسشىعا قاتىستى جازاتايىم وقيعانى مەملەكەتتىك ەڭبەك ينسپەكتسياسى تەرگەپ-تەكسەردى. ناتيجەسىندە جۇمىس بەرۋشىنىڭ كىناسى 100 پايىز دەپ تانىلىپ، قوسالقى مەردىگەرگە جالپى سوماسى 1,3 ميلليون تەڭگەگە جۋىقتايتىن ەكى ايىپپۇل سالىندى.

Атырау вокзалындағы жазатайым оқиға: қосалқы мердігерге 1,3 млн теңге айыппұл салынды
Фото: Атырау облысы әкімдігі

مەملەكەتتىك ەڭبەك ينسپەكتسياسى كوميتەتىنىڭ اتىراۋ وبلىسى بويىنشا دەپارتامەنتىنىڭ ءبولىم باسشىسى يسلام يگامبەرديەۆتىڭ ايتۋىنشا، تەكسەرۋ بارىسىندا جۇمىسشىمەن ەڭبەك شارتى جاسالماعانى جانە جازاتايىم وقيعا تۋرالى دەر كەزىندە حابارلانباعانى انىقتالعان.

- جۇمىس بەرۋشىگە «ا ب ك ستروي» جەكە كاسىپكەرلىگىنە ەكى ايىپپۇل سالىندى. ءبىرى - ەڭبەك شارتىن جاساماعانى ءۇشىن، ەكىنشىسى بىزگە ۋاقىتىندا حابارلاماعانىمەن بايلانىستى. بۇل جاعداي تۋرالى الدىمەن «باتىساليانسستروي» مەكەمەسىنەن بىلدىك. كەيىن انىقتاۋ بارىسىندا جۇمىسشىنىڭ جەكە كاسىپكەر «ا ب ك سترويدا» ەڭبەك ەتكەنى بەلگىلى بولدى، - دەدى يسلام يگامبەرديەۆ.

ۆوكزالدى جاڭعىرتۋ جۇمىسىنىڭ باس مەردىگەرى - «باتىساليانسستروي» ج ش س. ال زارداپ شەككەن جۇمىسشى قوسالقى مەردىگەر رەتىندە تارتىلعان جەكە كاسىپكەرگە جۇمىس ىستەگەن.

- باس مەردىگەر ەڭبەك قاۋىپسىزدىگىن ۇيلەستىرۋگە جانە باقىلاۋعا مىندەتتى. الايدا «باتىساليانسستروي» ج ش س تاراپىنان ءتيىستى باقىلاۋ جۇرگىزىلمەگەن، - دەدى يسلام يگامبەرديەۆ.

ەڭبەك ينسپەكتورلارى تەكسەرىس قورىتىندىسىن اتىراۋ ستانتسياسىنداعى جەلىلىك پوليتسيا بولىمىنە جولداعان. 15-قازان كۇنى جازاتايىم وقيعا تىركەلگەن كەزدە ەڭبەك قاۋىپسىزدىگى قاعيدالارىن بۇزۋ دەرەگى بويىنشا قىلمىستىق ءىس قوزعالعان ەدى.

- قازىرگى ۋاقىتتا قىلمىستىق ءىس بويىنشا وقيعانىڭ ءمان-جايىن تولىق، جان-جاقتى جانە وبەكتيۆتى انىقتاۋعا باعىتتالعان قاجەتتى تەرگەۋ ارەكەتتەرى جۇرگىزىلۋدە. وزگە اقپارات ق ر قىلمىستىق-پروتسەستىك كودەكسىنىڭ 201-بابىنا سايكەس تەرگەۋ مۇددەسىنە وراي جاريا ەتۋگە جاتپايدى، - دەپ حابارلادى كولىكتەگى پوليتسيا دەپارتامەنتى.

ال اتىراۋ وبلىستىق دەنساۋلىق ساقتاۋ باسقارماسى، زارداپ شەككەن 42 جاستاعى ازاماتتىڭ جاعدايى ءالى دە اۋىر ەكەنىن ايتىپ، اۋرۋحانادا ەم الىپ جاتقانىن مالىمدەدى.

قازاقستاندىق مۇناي- گاز كەشەنى قىزمەتكەرلەرىنىڭ سالالىق كاسىپتىك وداعىنىڭ اتىراۋ وبلىستىق فيليالىنىڭ ءتوراعاسى سالتانات راحيموۆا جۇمىس ورىندارىندا قاۋىپسىزدىك تالاپتارىن ساقتاۋ ماسەلەسىنە تۇراقتى نازار اۋدارۋ قاجەت ەكەنىن ايتتى. ونىڭ پىكىرىنشە، ەڭبەك ينسپەكتسياسى ادام ومىرىنە قاۋىپ تونگەن جاعدايدا جەدەل تەكسەرۋ جۇرگىزە الۋى ءتيىس.

- قالا كوشەلەرىندە كەتىپ بارا جاتىپ كەيدە بەلىندە ساقتاندىرۋ بەلدىگى جوق، بيىكتىكتە جۇمىس ىستەپ جاتقان ادامداردى كوزىمىز شالىپ قالادى. سونداي جاعدايدا ەڭبەك ينسپەكتسياسىنىڭ تەز ارادا ارەكەت ەتە الاتىن مۇمكىندىگى بولۋى كەرەك. وكىنىشكە قاراي، زاڭنامالىق تۇرعىدان ونداي مۇمكىندىك قاراستىرىلماعان. ادام ومىرىنە قاۋىپ ءتونىپ تۇرعان جاعدايدا بىردەن تەكسەرۋ تاعايىنداپ، جۇمىس بەرۋشىنىڭ ەڭبەك قاۋىپسىزدىگى تالاپتارىن ساقتاۋ جاعدايىن الدىن الا حابارلاماي تەكسەرۋ كەرەك، - دەدى سالتانات راحيموۆا.

ەڭبەك ينسپەكتورلارىنىڭ ايتۋىنشا، قولدانىستاعى ءتارتىپ بويىنشا ەڭبەك قاۋىپسىزدىگى تالاپتارىنىڭ بۇزىلعانى تۋرالى شاعىم الدىمەن سارالانىپ، تەك پروكۋراتۋرانىڭ رۇقساتىمەن تەكسەرىس تاعايىندالادى. سوندىقتان زاڭگەر سالتانات راحيموۆا ادام ومىرىنە قاۋىپ تونگەن جاعدايدا الدىن الا ەسكەرتۋسىز تەكسەرۋ جۇرگىزۋگە مۇمكىندىك بەرەتىن نورمالاردى ەڭبەك جانە كاسىپكەرلىك كودەكستەرىنە ەنگىزۋدى ۇسىندى.