اتىراۋ وبلىسىنىڭ فەرمەرلەرى نەسيەگە ءتورت تۇلىك بەرۋ جوباسىن قولدادى

اتىراۋ. KAZINFORM - اتىراۋ وبلىسىنىڭ فەرمەرلەرى تاۋارلى نەسيە بەرۋ باعدارلاماسىنا قولداۋ ءبىلدىردى. ەندى ولار نەسيەگە 990 باس مال بەرۋدى كوزدەپ وتىر.

پرەمەر- ءمينيستردىڭ كەڭەسشىسى ەرالى توعجانوۆتىڭ ايتۋىنشا، تاۋارلىق نەسيەنىڭ ماقساتى - اۋىل تۇرعىندارىنىڭ ءال- اۋقاتىن كوتەرۋ. جاڭا جوبا كرەديتتىك جاعدايى قيىن جانە كەپىلگە قوياتىن مۇلكى جوق ادامدارعا ارنالعان. ولار كەپىلسىز، پايىزسىز تاۋارلى نەسيە الىپ، ءتورت- تۇلىكتى كوبەيتە الادى.

«ءبىز اۋىل كاسىپكەرلەرىمەن كەڭەسىپ، تاۋارلى نەسيە جوباسىن ويلاستىردىق. بۇل باستامانى قولداعان فەرمەرلەر از قامتىلعان وتباسىلارعا 8880 مال تاراتتى. جوباعا سايكەس، 5 جىلعا نەسيەگە 10 سيىر بەرىلەدى. ونى قايتارۋ شارتىنا بويىنشا ءبىرىنشى جىلى - دەمالىس. نەسيەگە مال العان ادام ەكىنشى جىلى 4، ءۇشىنشى جىلى تاعى 4 سيىردى قايتارۋى ءتيىس. ءبىزدىڭ ەسەبىمىزشە، 4-جىلى مال سانى تولىمەن 16 عا جەتۋى كەرەك. ال، 7 جىلدا ءمۇيىزدى ءىرى قارانى 24 كە دەيىن كوبەيتۋگە بولادى»، - دەدى ەرالى توعجانوۆ.

جەرگىلىكتى فەرمەرلەر اكىمدىكتىڭ بۇل ۇسىنىسىنا قولداۋ ءبىلدىرىپ وتىر. ولار اتالعان باعدارلامامەن تاۋارلى نەسيە بەرۋگە دايىن.

«اۋىل تۇرعىندارىن كاسىپكەرلىككە ىنتالاندىرۋ ماقساتىندا قولعا الىنعان تاۋارلىق نەسيەنى قولدايمىز. ءوزىم جەتەكشىلىك ەتەتىن جىلىوي اۋدانىنداعى شارۋا قوجالىعىنان 300 قوي، 100 جىلقى، 50 سيىر جانە 30 تۇيەنى نەسيەگە بەرەمىن. وسى ارقىلى تاۋار الۋشىنىڭ دا، ءبىزدىڭ دە ءتورت تۇلىگىمىز كوبەيەدى»، - دەدى «دوستان اتا» شارۋا قوجالىعىنىڭ جەتەكشىسى سەيتجان بالجىگىتوۆ.

ال قىزىلقوعا اۋدانىنداعى «قۇرمان» شارۋا قوجالىعىنىڭ جەتەكشىسى قۇرمان جاڭابايەۆ 100 قوي، 50 جىلقى جانە 30 سيىر ۇسىنىپ وتىر. جىلىوي اۋدانىندا تىركەلگەن «اشىساي» شارۋا قوجالىعىنىڭ جەتەكشىسى باقتىعالي جيەنقۇلوۆ 300 قوي-ەشكى مەن 30 جىلقىنى نەسيەگە بەرگىسى كەلەدى.

اقتوبە وبلىسىنىڭ فەرمەرلەرى اتاعان باعدارلامامەن جۇمىس ىستەۋ تاجىريبيەسىمەن ءبولىستى.

«ءبىز نەسيەگە مال بەرۋدى ەرتە باستادىق. اقتوبەدەگى ءىرى شارۋاشىلىعى بار كووپەراتيۆتەر مالدى جۇمىسسىزدار مەن اتاۋلى الەۋمەتتىك كومەك الۋشىلارعا بەرىپ كەلەدى. مەن تاۋارلى نەسيەگە 4 مىڭ قوي مەن 120 سيىر بەردىم. قازىر نەسيەگە بەرىلگەن مالدىڭ 40 پايىزىن قايتارىپ الدىم. بۇل جوبانىڭ ەكى جاققا دا تيىمدىلىگى بار. جالپى «اۋىل اماناتى» باعدارلاماسىمەن بەرىلەتىن نەسيە اۋىل شارۋاشىلىعىن دامىتۋعا كوپ مۇمكىندىك بەرەدى. ءبىز باعدارلامانىڭ جەمىسىن كورىپ وتىرمىز»، - دەدى اقتوبە وبلىسىنىڭ كاسىپكەرى كامشات تولەۋوۆا.