اتىراۋ وبلىسىنداعى تالدىكول اۋىلىنىڭ تۇرعىندارىن ەۆاكۋاتسيالاۋ باستالدى

эвакуация
Фото: ДЧС Акмолинской области

 اتىراۋ. KAZINFORM - اتىراۋ وبلىسىنداعى تالدىكول اۋىلىنىڭ تۇرعىندارىن ەۆاكۋاتسيالاۋ باستالدى. مۇنداي شەشىم تاسقىن سۋدىڭ اۋىلعا كىرەتىن جولدى باسۋ قاۋپىنە بايلانىستى قابىلدانعان.

ماحامبەت اۋدانىنىڭ اكىمى قايرات نۇرلىبايەۆتىڭ ايتۋىنشا، تاسقىن سۋ تالدىكول اۋىلىنا كىرەتىن جولدىڭ ەكى بولىگىنە جايىلعان.

«وسىعان بايلانىستى تۇرعىنداردى الدىن الا قاۋىپسىز اۋماققا ەۆاكۋاتسيالاۋ باستالدى. ءبىرىنشى كەزەكتە جۇكتى ايەلدەر، بالالار مەن زەينەت جاسىنداعى قاريالار كوشىرىلەدى. ال، اۋىر ناۋقاستار وبلىستىق دەنساۋلىق ساقتاۋ باسقارماسى ازىرلەگەن الگوريتم بويىنشا ەۆاكۋاتسيالانادى. تۇرعىندار ءۇشىن اتىراۋ قالاسىنداعى APEC جوعارى كوللەدجىندە جانە «Dana» قوناق ۇيىندە ەۆاكۋاتسيالىق پۋنكتتەر دايىندالدى»، - دەدى قايرات نۇرلىبايەۆ.

ونىڭ ايتۋىنا قاراعاندا، تالدىكول اۋىلىندا 1,5 مىڭعا جۋىق تۇرعىن تۇرادى. ال، اۋىلعا كىرەتىن جولدىڭ ۇزىندىعى 7 شاقىرىمدى قۇرايدى.

ەسكە سالا كەتەلىك، بۇعان دەيىن اتىراۋ وبلىسىنداعى تالدىكول اۋىلىن تاسقىن سۋ باسۋ ءقاۋپى جوعارى ەكەنىن جازعان بولاتىنبىز.

سوڭعى جاڭالىقتار