اتىراۋ وبلىسىنداعى سارايشىق قالاشىعىن تاسقىننان قورعاۋ جۇمىستارى باستالدى
اتىراۋ. KAZINFORM - ۆيتسە-پرەمەر قانات بوزىمبايەۆ يندەر اۋدانى يندەربور، جاسۋات، سونداي-اق اتىراۋ وبلىسى ماحامبەت اۋدانىنا قاراستى ماحامبەت، سارايشىق، تالدىكول اۋىلدارىندا جاعالاۋدى نىعايتۋ جۇمىستارىن تەكسەردى.
وڭىردە سۋ تاسقىنى قاۋپى ساقتالۋدا. ورال- يندەربور جانە ورال- ماحامبەت گيدروپوستىندا سۋ دەڭگەيى قاۋىپتى بەلگىدەن اسقان. جايىق وزەنىنىڭ دەڭگەيى ءالى دە ارتا تۇسەدى دەپ بولجانىپ وتىر.
بارلىق قاۋىپتى ۋچاسكەدە تاۋلىك بويى كەزەكشىلىك ۇيىمداستىرىلدى. تابيعي اپاتپەن كۇرەسكە جەرگىلىكتى تۇرعىندار، ەرىكتىلەر جانە ءتۇرلى كاسىپورىن قىزمەتكەرلەرى بەلسەندى قاتىسادى.
يندەر اۋدانىندا جەر بوگەتتەرىنىڭ جالپى ۇزىندىعى - 30 شاقىرىم. قورعانىس بوگەتى جارسۋات، يندەربور، قۇرىلىس، كوكتوعاي، ورلىك، ەسبول جانە ەلتاي ەلدى مەكەندەرىندە سالىنعان. جۇمىستارعا 40 تان استام ارنايى تەحنيكا، 300 گە جۋىق اسكەري قىزمەتشى جانە 100 گە جۋىق ت ج قىزمەتكەرى، ونىڭ ىشىندە قىزىلوردا وبلىسى ت ج د قىزمەتكەرلەرى جۇمىلدىرىلدى.
ماحامبەت اۋدانىندا جايىق وزەنىنىڭ بويىندا 17 ەلدى مەكەن ورنالاسقان. ولاردى قورعاۋ ءۇشىن 80 كم جاعالاۋدى نىعايتاتىن بوگەتتەر سالىندى. اۋدانداعى بوگەتتەردىڭ ۇزىندىعى - 105,8 ك م. سۋ تاسقىنىنا قارسى ءىس-شارالار جالعاسىپ جاتىر. 130 بىرلىك ارنايى تەحنيكا، 650 اسكەري قىزمەتشى، 200 دەن استام ت ج قىزمەتكەرى، 300 گە جۋىق ەرىكتىلەر مەن جەرگىلىكتى تۇرعىندار تارتىلدى.
ءوز كەزەگىندە ۆيتسە-پرەمەر قانات بوزىمبايەۆ ماحامبەت اۋدانىنىڭ اكىمىنە ەجەلگى سارايشىق قالاشىعىنىڭ بويىنداعى جايىق وزەنىنىڭ بويىنداعى بوگەتتى قوسىمشا كوتەرۋدى تاپسىردى.
«بۇل جەرگە ونداعان تەحنيكا مەن قورعانىس مينيسترلىگىنىڭ جەكە قۇرامىنىڭ جۇزدەگەن ادامى تارتىلادى. ءبىزدىڭ تاريحي مۇرامىزدى قورعاۋعا جانە ساقتاۋعا جاۋاپكەرشىلىكپەن قاراۋ قاجەت»، - دەدى قانات بوزىمبايەۆ.
اۆتور
ابىلايحان جۇماشيەۆ
