اتىراۋ وبلىسىندا پوليسەيلەر جوعالعان 70 مالدى يەلەرىنە تاۋىپ بەردى

استانا. KAZINFORM - اتىراۋ وبلىسى اۋماعىندا مال ۇرلىعىنىڭ الدىن الۋ جانە اشۋ، ولاردى جاساۋمەن اينالىساتىن تۇلعالاردى انىقتاۋ ماقساتىندا ءتۇرلى ءىس- شارالار وتكىزىلىپ تۇرادى. اتاپ ايتار بولساق، بيىل وبلىستا جوعالعان 70 مال يەلەرىنە قايتارىلدى.

Polisia.kz ءتىڭ مالىمەتىنشە، جىل باسىنان بەرى مال ۇرلىعىنا قاتىستى پوليتسەيلەر 27 قىلمىستى اشىپ، جوعالعان 70 مال يەلەرىنە تابىستالعان. جۇرگىزىلگەن جەدەل- ىزدەستىرۋ شارالارى ناتيجەسىندە مال ۇرلىعىمەن اينالىسقان 1 قىلمىستىق توپ قۇرىقتالىپ، 7 ادام ۇستالدى.

اتىراۋ وبلىسى پوليتسيا دەپارتامەنتى وبلىس كولەمىندە مال ۇرلىعى قىلمىسىنىڭ الدىن الىپ، اشۋعا باعىتتالعان ءىس- شارالاردى جۇيەلى تۇردە ۇيىمداستىرىپ كەلەدى.

ايتا كەتەيىك، مال ۇرلاۋ، ياعني بوتەننىڭ مالىن جاسىرىن جىمقىرۋ -مۇلكى تاركىلەنىپ، ءۇش مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا، نە بەس جىلعا دەيىنگى مەرزىمگە باس بوستاندىعىن شەكتەۋگە، نە سول مەرزىمگە باس بوستاندىعىنان ايىرۋعا جازالانادى.

بۇعان دەيىن باتىس قازاقستاندا مالدى جايۋ قاعيدالارىن بۇزعان 2 مىڭنان استام ادامعا ايىپپۇل سالىنعانىن حابارلاعان ەدىك.