اتىراۋ وبلىسىندا سۋ تاسقىنى كەزىندە 26 مىڭنان استام ادام ەۆاكۋاتسيالاندى

اتىراۋ. KAZINFORM - اتىراۋ وبلىسىندا 1-ساۋىردەن بەرى تاسقىن سۋ قاۋپىنەن 26467 ادام ەۆاكۋاتسيالاندى. ونىڭ ىشىندە 5976 بالا بار.

اتىراۋ وبلىستىق توتەنشە جاعدايلار دەپارتامەنتى قوعاممەن بايلانىس توبىنىڭ مالىمەتىنە سۇيەنسەك، قۇلسارى قالاسىندا 2810 تۇرعىن ءۇي جانە ينفراقۇرىلىمداردى سۋ باسقان.

«قازىر جىلىوي اۋدانىنىڭ ورتالىعى - قۇلسارى قالاسىندا تاسىقان سۋدان قورعايتىن بوگەتتى نىعايتۋ جۇمىسى جالعاسىپ جاتىر. وعان جەرگىلىكتى اتقارۋشى

ورگاننان 1135 گە جۋىق، توتەنشە جاعدايلار، پوليتسيا دەپارتامەنتتەرىنىڭ، اسكەري ءبولىم قىزمەتكەرلەرى، 4640 ەرىكتىلەر مەن تۇرعىندار جۇمىلعان. بۇل جۇمىسقا 204 تەحنيكا، 6 ءجۇزۋ قۇرالى، 4 موتوپومپا تارتىلعان. تاسقىن سۋعا قارسى قۇم تولتىرىلعان 46352 قاپ، 174372 توننا ينەرتتى ماتەريال توسەلدى»، - دەپ حابارلادى دەپارتامەنتتىڭ قوعاممەن بايلانىس توبى.

قۇلسارى قالاسىنا كومەككە ماڭعىستاۋ، الماتى، اقتوبە وبلىستارى توتەنشە جاعدايلار دەپارتامەنتتەرىنەن 130 قىزمەتكەرى 8 تەحنيكا، 11 ءجۇزۋ قۇرالى جانە 17 موتوپومپامەن كومەككە كەلگەن.

«اتىراۋ وبلىسىندا 1-6-ءساۋىر ارالىعىندا تاسقىن سۋ قاۋپىنەن 26467 تۇرعىن ەۆاكۋاتسيالاندى. ونىڭ ىشىندە 5976 بالا بار. ەۆاكۋاتسيالانعان تۇرعىندار قابىلداۋ پۋنكتەرىنە ورنالاستىرىلدى»، - دەپ ءمالىم ەتتى دەپارتامەنتتىڭ قوعاممەن بايلانىس توبىنان.

ەسكە سالا كەتەلىك، بۇدان بۇرىن تاسقىن سۋ قۇلسارى قالاسىنا كىرە باستاعانىن حابارلاعان بولاتىنبىز.

اتىراۋداعى قۇلسارى قالاسىنان 12 مىڭنان استام ادام ەۆاكۋاتسيالاندى.

سونداي-اق، اتىراۋ وبلىسىندا ەۆاكۋاتسيالاۋ ءۇشىن 15 مىڭ ورىن دايىندالعانىن جازعان ەدىك.